Мемлекет басшысы Қасым-Жомарт Тоқаев V Еуразиялық экономикалық форумның пленарлық сессиясында әлемдік экономикадағы өзгерістер мен Еуразиялық экономикалық одақтың алдағы міндеттері туралы айтты, – деп хабарлайды 7-su.kz ақпараттық порталы.
Президенттің сөзінше, бұрын-соңды болмаған геосаяси дүрбелеңдер кезеңінде ЕАЭО-ға мүше мемлекеттер үйлесімді іс-қимылдың арқасында экономикаларының тұрақтылығын сақтап, әлемдік нарықтағы бәсекеге қабілеттілігін қамтамасыз ете алды.
– Қазір біздің алдымызда Еуразиялық экономикалық одақтың әлеуетін одан әрі арттырып, қарқынды дамыту жөнінде стратегиялық маңызды міндет тұр. Дүниежүзілік шаруашылық байланыстарының бағдары жаппай өзгеріп жатқан кезеңде біз теріс сипаттағы жаһандық үрдістерге төтеп беру үшін күш-жігерімізді жұмылдыруымыз керек, – деді Мемлекет басшысы.
Қасым-Жомарт Тоқаев қазіргі таңда әлемдік нарықтағы жағдайдың күрделене түскенін атап өтті.
– Әлемдік нарықтағы ахуал күрделі, тіпті көп жағдайда болжап біле алмайсыз. Өзімізге етене таныс экономикалық сынақтарға қоса, цифрлық салада ауқымды өзгерістер болып жатыр. Бұл көп ұзамай «ойын ережесін» толықтай жаңартады. Осыған орай бүгінгі форум тақырыбының өзектілігі арта түсті, – деді Президент.
