«Ауыл» партиясының төрағасы, ҚР Парламенті Мәжілісінің депутаты Серік Егізбаев Жетісу облысындағы белсенді жастармен, еріктілер және үкіметтік емес ұйым өкілдерімен кездесті.
Талдықорғандағы Тіл сарайында өткен жиында партия төрағасы республика көлемінде бірнеше ірі жобалар қолға алынғанын айтып, атқарылған жұмыстарды баяндады. Жобалардың ішіндегі ең маңыздысы – көктемгі су тасқыны кезінде «Жастардың құрылыс жасақтарының» құрылуы.
Су тасқыны кезінде ең көп зардап шеккен Солтүстік Қазақстан облысы және Батыс Қазақстан облысы аймақтарында жастар құрылыс жасақтары құрылып, 80 студент қираған үйлердің құрылыс жұмыстарына қатысқан. Халық қалаулысы биылдан бастап «Жастардың еңбек жасақтарын» барлық өңірлерде құруды жоспарлап отыр.
– Біз тек құрылыс жасақтарымен шектелмей, механикаландырылған, туристік, педагогикалық, экологиялық, жастар жасақтарын құруды қолға аламыз, – дейді Серік Рахметоллаұлы.
