Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия жазғы демалыс кезеңінде балалардың қауіпсіздігіне ерекше назар аударуға шақырды, – деп хабарлайды 7-su.kz ақпараттық порталы.
Комиссия мәліметінше, жаз айларында оқушылардың көшеде, ойын алаңдарында және демалыс орындарында жиі болуы олардың түрлі қауіп-қатерге тап болу ықтималдығын арттырады. Әсіресе, жол-көлік оқиғалары салдарынан кәмелетке толмағандардың жарақат алуы мен қаза болуы алаңдаушылық туғызып отыр.
Осыған байланысты ата-аналарға балаларға жол қозғалысы ережелерін тұрақты түсіндіріп, оларды қараусыз қалдырмау ұсынылды. Сондай-ақ су айдындары маңында, табиғат аясында және үй жағдайында қауіпсіздік талаптарын сақтаудың маңыздылығы атап өтілді.
Ал жүргізушілерге тұрғын үйлер орналасқан аумақтарда, аулаларда, саябақтар мен балалар алаңдарына жақын жерлерде ерекше мұқият болу қажеттігі ескертілді. Сонымен қатар көлік жүргізу кезінде ұялы телефон қолданбау және белгіленген жылдамдық режимін сақтау ұсынылды.
– Балалардың өмірі мен денсаулығы – отбасының, қоғамның және мемлекеттің ортақ жауапкершілігі. Ересектердің қырағылығы көптеген қауіптің алдын алуға мүмкіндік береді, – делінген Ұлттық комиссияның үндеуінде.
