Мемлекет азаматтарды қымбат әрі жоғары технологиялы медициналық көмекпен қамтамасыз ету бағытындағы жұмысты жүйелі түрде жалғастыруда, – деп хабарлайды 7-su.kz ақпараттық порталы.
Тегін медициналық көмектің кепілдік берілген көлемі мен міндетті әлеуметтік медициналық сақтандыру жүйесі арқылы қазақстандықтар табыс деңгейіне қарамастан заманауи диагностика, емдеу әдістері және күрделі хирургиялық операцияларға қол жеткізіп отыр.
Әсіресе ауыр туа біткен аурулары мен патологиялары бар балаларға ерекше көңіл бөлінуде. Жыл сайын туа біткен аурулары бар шамамен 1,5 мың нәрестеге операция жасалса, олардың 40 пайызы аз инвазивті эндовидеохирургиялық заманауи технологиялармен атқарылады. Сонымен қатар балалар кардиохирургиясы да ілгерілеп келеді. Жыл сайын елімізде жүрек-қан тамыр жүйесінің туа біткен ақаулары бар балаларға шамамен 2 мың ашық операция жасалады.
Заманауи медициналық технологияларды енгізу нәрестелердің операциядан кейінгі өміршеңдігін 88 пайыздан 93 пайызға дейін арттыруға мүмкіндік берді. Тәжірибеге енген 19 инновациялық медициналық технология балаларды шетелде емдеуге жіберу санын екі есе қысқартып, күрделі ем-домды ел ішінде қолжетімді етті.
Қымбат ем мен дәрі-дәрмекпен қамту аясы да кеңейе түсті. 2018 жылы тегін дәрі-дәрмекпен 1,9 миллион адам қамтылса, 2025 жылға қарай көрсеткіш 3,4 миллионға жетті. Амбулаториялық дәрі-дәрмекпен қамтамасыз етуге бөлінетін қаржы осы кезеңде 87,2 миллиард теңгеден 337,4 миллиард теңгеге дейін, яғни үш еседен астам өсті.
