Бүгінде ауылда отырып-ақ кәсібін дөңгелентіп жүрген қыз-келіншек аз емес. Осындай еңбекқор жандардың бірі – Алмалы ауылының тұрғыны, көпбалалы ана Салтанат Нұрғазинова.
Кейіпкеріміз біраз жылдан бері сиыр сауып, сүттен түрлі тағам әзірлеумен айналысады. Кәсіпкер келіншек күн сайын таңның атысынан тіршілігін бастап, жаңа сауылған сүттен айран ұйытады, қатық жасап, кілегей тартады, май шайқап, құрт қайнатады.
Кәсіпкер өнімдерінің басты ерекшелігі – табиғилығында. Ешқандай қоспасыз, таза сүттен дайындалатындықтан тұтынушылар тарапынан сұраныс жоғары. Салтанаттың айтуынша, бүгінгі ауылда табыс табудың мүмкіндігі мол. Тек еңбек пен төзім қажет. Алғашында ол тек отбасының қажетіне өнім дайындаса, кейін көрші-қолаң мен ауыл тұрғындары тапсырыс бере бастаған. Қазір тұрақты тұтынушылары қалыптасып, кәсібі кеңейіп келеді.
– Осы ауылдың тұрғынымын. Бұрын қалаға кетіп, қайта көшіп келдім. Кәсібім 1 сиырдан басталды. Кейіннен оны көбейтіп, 15-ке жеткіздім. Сонымен бірге 2 ешкі сауамын. Оның сүтін көбіне тұрғындар балаларының денсаулығы үшін алады. Дайын өнімдерімізді ауыл, аудан халқымен қатар Алматы, Талдықорған қаласының тұрғындары пайдаланады. Тіпті, Қарағандыда да тұтынушыларымыз бар. Қалалықтар әсіресе ауылдың таза қаймағы мен сары майын іздейді. Сондықтан сатып алушылар көп. Жент те жасаймын. Еңбектің наны тәтті ғой, адал кәсіп берекесін береді, – дейді кәсіпкер келіншек.
Сиырдан күніне 200 литр сүт сауылады. «Ауыл аманаты» жобасы арқылы 2,5 пайыз несиеге қол жеткізіп, бүгінде ол төленген. Салтанат бұл жұмыстың бәрін қол еңбегімен атқарады. Алдағы уақытта ісін кеңейтіп, қасына адам алуды ойлап отыр. Ауыл әйелдерінің кәсіп бастауы тек отбасы табысын арттырып қана қоймай, ұлттық тағамдардың ұмытылмауына да ықпалын тигізуде.
Қазақтың дәстүрлі өнімдерін дайындау – ұрпақтан ұрпаққа жалғасқан өнер. Бүгінде сол кәсіпті заманауи нарыққа бейімдеп отырған Салтанат секілді келіншектер көпке үлгі. Мұндай кәсіптің ауыл экономикасына да пайдасы зор. Бірі сүт қабылдап, енді бірі дайын өнім сатып, шағын кәсіп көзін қалыптастыруда.
Ең бастысы – ауыл әйелдерінің еңбекке құлшынысы жоғары. Олар таңнан кешке дейін тынымсыз жұмыс істеп, адал еңбектің арқасында отбасын асырап, кәсібін дөңгелетіп отыр. Табиғи өнім өндірген кәсіпкер келіншектердің еңбегі әрдайым құрметке лайық.
Айгүл БАЙБОСЫНОВА
