Қазақстан ТМД елдері арасында көшуге ең қолайлы мемлекет атанды, – деп хабарлайды 7-su.kz ақпараттық порталы.
Америкалық Remitly компаниясы жариялаған Immigration Index 2026 халықаралық рейтингінде Қазақстан ТМД елдері арасында көшуге ең қолайлы мемлекет ретінде танылды.
82 ел қамтылған әлемдік рейтингте Қазақстан 53-орынға тұрақтап, зерттеуге енгізілген посткеңестік мемлекеттердің барлығынан жоғары нәтиже көрсетті.
Рейтингтегі өзге ТМД елдерінің көрсеткіштері төмендегідей:
– Молдова – 56-орын;
– Әзербайжан – 66-орын;
– Армения – 74-орын;
– Өзбекстан – 75-орын.
Ал Ресей, Беларусь, Қырғызстан, Тәжікстан және Украина аталған зерттеуге енгізілмеген.
Зерттеу барысында елдер 16 санатқа біріктірілген 34 көрсеткіш бойынша бағаланған. Бағалау критерийлері қатарында қауіпсіздік деңгейі, денсаулық сақтау және білім беру сапасы, экологиялық жағдай, жұмысқа орналасу мүмкіндігі, өмір сүру құны, тұрғын үйдің қолжетімділігі, қоғамдық көлік инфрақұрылымы, отбасыларды қолдау тетіктері және ірі мигранттық қауымдастықтардың болуы ескерілген.
Әлемдік рейтингтің алғашқы үштігіне Швейцария, Исландия және Люксембург енді. Сонымен қатар алғашқы бестік қатарында Австралия мен Германия бар. Ал рейтингтің соңғы сатысында Куба орналасқан.
Remitly мәліметінше, рейтингті қалыптастыру кезінде экономикалық көрсеткіштермен қатар өмір сапасы, қауіпсіздік, отбасыларға қолайлылық және мигранттардың ұзақ мерзімді бейімделу мүмкіндіктері де назарға алынған.
Зерттеу қорытындысы бойынша, қазіргі таңда көшуге ниетті азаматтар үшін өмір сапасы, қауіпсіз орта, медициналық қызметтердің қолжетімділігі және болашаққа тұрақты жағдай қалыптастыру мүмкіндігі негізгі факторлар ретінде қарастырылған.
