Талдықорған қаласындағы Қазақстан Республикасы Қорғаныс министрлігінің «Әскери-техникалық мектеп» республикалық мемлекеттік қазыналық кәсіпорны филиалының тәрбиеленушілері әскери ант қабылдады, – деп хабарлайды 7-su.kz ақпараттық порталы.
Әскери ант қабылдау рәсімі Екінші дүниежүзілік соғыс жауынгерлеріне арналған ескерткіш аумағында өтіп, тәрбиеленушілер ескерткішке гүл шоқтарын қойды. Жиналғандар ел тыныштығы мен қауіпсіздігі үшін жанын қиған боздақтарды бір минут үнсіздікпен еске алды.
Мерекелік шараға тәрбиеленушілердің ата-аналары мен жақындары, Қарулы күштердің ардагерлері, ауған соғысы ардагерлері мен интернационалист жауынгерлер, сондай-ақ құрметті қонақтар қатысты.
Жиын барысында жас тәрбиеленушілер Отан алдындағы жауапкершілікті сезініп, елге адал қызмет етуге ант берді. Қонақтар жастарды маңызды оқиғамен құттықтап, олардың бойындағы патриоттық рух пен азаматтық жауапкершіліктің маңызын атап өтті.
