Жазғы демалыс қарсаңында Талдықорған қаласындағы №29 орта мектепте жасөспірімдер арасында нашақорлықтың алдын алуға және салауатты өмір салтын насихаттауға бағытталған «Өмір үшін өзіңді сақта» атты ауқымды профилактикалық акция ұйымдастырылды, – деп хабарлайды 7-su.kz ақпараттық порталы.
Іс-шараны Талдықорған қаласының Ішкі саясат бөлімінің тапсырысы бойынша «ҚОС ҚАНАТ ЖЕТІСУ» қоғамдық бірлестігі өткізді. Акцияға 200-ге жуық адам – оқушылар, мұғалімдер және ата-аналар қатысып, өскелең ұрпақтың денсаулығы мен жарқын болашағы жолында бас қосты.
Бүгінде жастар арасында есірткінің таралуы қоғамдағы өзекті мәселелердің бірі болып отыр. Сондықтан жасөспірімдерге зиянды әдеттердің салдары туралы шынайы ақпарат беру және олардың дұрыс өмірлік таңдау жасауына ықпал ету мақсатындағы профилактикалық жұмыстардың маңызы зор.
Кездесудің құрметті қонақтары ретінде психиатр-нарколог дәрігер Мұхамеджан Т.С. және Жетісу облысы бойынша есірткі қылмысына қарсы іс-қимыл департаментінің қызметкерлері қатысты. Акция барысында полиция капитаны Әбдушева М.Г. сөз сөйлеп, жасөспірімдерді есірткі айналымына тартудың заманауи тәсілдері туралы айтып берді. Сонымен қатар, ол тыйым салынған заттарды сақтау мен таратудың заң алдындағы жауапкершілігіне ерекше тоқталды.
Қатысушылардың ерекше қызығушылығын нарколог-дәрігердің баяндамасы тудырды. Мұхамеджан Т.С. есірткінің адам ағзасына, психикалық денсаулығына және әлеуметтік өміріне тигізетін зияны туралы түсінікті әрі ашық түрде әңгімеледі. Ашық форматта өткен кездесуде оқушылар өздерін толғандырған сұрақтарын қойып, маманнан кәсіби жауаптар алды.
Іс-шара өзара сенім мен ашық диалог атмосферасында өтті. Ұйымдастырушылар жастардың денсаулығына жауапкершілікпен қарауын, пайдалы әдеттерді қалыптастыруын және дұрыс өмірлік құндылықтарды ұстануын насихаттайтын ақпараттық материалдар ұсынды.
Ұйымдастырушылардың айтуынша, мұндай кездесулер жасөспірімдердің ақпараттық сауаттылығын арттырып қана қоймай, олардың есірткіге қарсы берік ұстаным қалыптастыруына, заңды құрметтеуіне және салауатты өмір салтын таңдауға ықпал етеді.
«Өмір үшін өзіңді сақта» акциясы тағы бір мәрте жастар тәрбиесінде отбасы, мектеп, медицина қызметкерлері мен құқық қорғау органдарының бірлескен жұмысының маңыздылығын көрсетті. Осындай ортақ күш-жігердің арқасында ғана дені сау, қауіпсіздікті бағалайтын және болашағына сеніммен қарайтын ұрпақ тәрбиелеуге болады.
