Ақмола облысында тауық жұмыртқасын терең өңдеуге арналған ірі инвестициялық жоба жүзеге асырылуда, – деп хабарлайды 7-su.kz ақпараттық порталы.
ҚР Ауыл шаруашылығы министрлігінің мәліметінше, «Kaz Eggs» жауапкершілігі шектеулі серіктестігі қолға алған өндірістік кешен Целиноград ауданының Ақмол ауылында орналасады. Жобаның жалпы инвестиция көлемі 30 миллиард теңгені құрайды.
Болашақ кәсіпорынның өндірістік қуаты тәулігіне 1 миллион жұмыртқаны өңдеуге мүмкіндік береді. Кешенді іске қосу 2027 жылдың төртінші тоқсанына жоспарланған.
Жоба аясында өңірде 80 жаңа жұмыс орны ашылады деп күтілуде. Бұл ауыл тұрғындарын жұмыспен қамтуға және жергілікті экономиканың дамуына оң әсерін тигізбек.
Мамандардың айтуынша, жұмыртқаны терең өңдеу өнімнің қосылған құнын арттырып, агроөнеркәсіптік кешеннің тиімділігін көтеруге мүмкіндік береді. Сондай-ақ мұндай өндірістер азық-түлік өнеркәсібін әртараптандыруға және отандық өнімнің бәсекеге қабілеттілігін күшейтуге ықпал етеді.
Министрлік ауыл шаруашылығы шикізатын өңдеу бағытын дамыту елдің агроөнеркәсіптік кешеніндегі басым міндеттердің бірі екенін атап өтті.
– Министрлік заманауи өндірістерді құруға, отандық өнімнің бәсекеге қабілеттілігін арттыруға және еліміздің азық-түлік қауіпсіздігін нығайтуға бағытталған инвестициялық жобаларды жүйелі түрде қолдап келеді, – делінген ведомство хабарламасында.
Айта кетейік, аталған жоба Қазақстандағы азық-түлік өндірісін дамытуға және өңдеу өнеркәсібінің әлеуетін арттыруға бағытталған маңызды бастамалардың бірі саналады.
