Жасөспірімдердің кәсіби спортшы болып қалыптасуына мол мүмкіндік сыйлап, олардың болашағына әсер ететін «J-league» жобасы биыл 2-ші рет ұйымдастырылуда. Талдықорғандағы Орталық алаңда ресми ашылу рәсімі сән салтанатпен өтті. Биыл 3 спорт түріне (волейбол, баскетбол, футбол) 551 команда (5510 бала) тіркелді. Мамырда басталған жобаның аудан қалалық іріктеуінен өткендер облыс орталығында 17-20 маусым аралығында биылғы жеңімпазды анықтайды.
Ақтық кезеңде волейболдан 10, баскетболдан 10 команда және футболдан 30 команда сынға түседі. Биылғы жүлде қоры да қомақты. Үздік ойыншылар арнайы номинациялармен, грамотамен марапатталса, үздік үштікке енген командаларға диплом мен медальдан бөлек, ақшалай сертификат табысталады.
Салтанатты ашылу рәсіміне қатысқан облыс әкімінің орынбасары Диас Есдәулетов:
– «J-league» – Мемлекет басшысының бұқаралық спортты дамыту туралы тапсырмасына сәйкес қолға алған айтулы жобамыз. Жарыс қорытындысы бойынша үздік атанған, талапқа сай келген үздік спортшылар «Жетісу» футбол клубының орталығына, волейбол мектебіне және баскетбол клубына іріктеусіз қабылданып, барлық жағдаймен қамтамасыз етіледі. Бұл – өз шеберліктеріңізді дәлелдеп, кәсіби спортқа бастар жолдағы маңызды қадам, – деді өз сөзінде.
Артынша Диас Рахметұлы, облыс спортындағы белгілі мамандар Талғат Өмірбеков, Ерік Байсаринов, Арнұр Серікұлы, Рашит Парманов, Сағындық Қасымжанов, Айбек Диасұлы финалдық кезеңге жолдама алған балаларға 650 доп сыйлады.
Арнайы келген қонақтар тізімінде «Жетісу» футбол клубының бас бапкері Қайрат Нұрдәулетов және былтырғы «J-league» жобасының жеңімпазы, бүгінде футбол орталығында ойнайтын Медетбай Ерхан болды. Олар балаларға сәттілік тілеп, берілген мүмкіндікті сәтті пайдаланып, өздерін көрсетіп, үздіктер қатарында болуына ниеттес екендіктерін білдірді.
Футболдан ақтық сын «Болашақ» стадионында, ал волейболдан «Жетісу» клубының орталығында, баскетболдан «Өркен» спорт кешенінде өтеді.
Серік ҚАНТАЙ
