Көшелі өнер көшіне ілескен жалынды жастардың шығармашылығында қоғам құбылысына, заман тынысына байланысты ойлы туынды жарық көрсе, көпшілік болып қуану қажет-ақ. Өйткені жастың үні, жүрек сөзі – бүгіннің айна-қатесіз көрінісі. Осы ретте бейнелеу өнері арқылы осы кезеңнің қағидалы міндеті мен уақыт індетін қатар айшықтаған жас суретшілердің басын қосқан шара өтті.
Салалы саусағына қылқалам қапсырған жас суретшілер Талдықорған қаласындағы Оқушылар сарайында кездесті. Олар сыбайлас жемқорлыққа қарсы сананы қалыптастыруды, азаматтық жауапкершілікті арттыруды және адалдық қағидаттарын ерте жастан дәріптеуді мақсат тұтқан мазмұнды шарада уақыт індеті саналған жемқорлыққа қарсы көзқарасын сурет арқылы жеткізді.
Туындылары арқылы адалдық, әділдік, парасаттылықты дәріптеген жас суретшілер адам тағдырын күрделендіріп, қоғамның қарыштауына тұсау, дамуына шідер болған сыбайлас жемқорлыққа төзбеушілік қағидаттарын да өз қиялы арқылы ақ қағазға қондырды. Оқушылар суреттерінде заң үстемдігі, әділ қоғам және әр азаматтың жеке жауапкершілігі сынды маңызды құндылықтарды да айырықша көрсетті.
Мұндай бастамалар балалардың заң мен тәртіп, әділдікке деген дұрыс көзқарасын қалыптастырып, шығармашылық арқылы қоғамда сыбайлас жемқорлыққа қарсы мәдениетті нығайтуға ықпал етеді. Бұл ретте жемқорлықсыз қоғам туралы ой-пікірлерін сурет арқылы жеткізген жас суретшілер шара соңында шығармашылық жұмыстарын таныстырды.
Мемлекеттік қызмет істері агенттігінің Жетісу облысы бойынша департаменті
