Қазақстан Республикасының Бас прокуратурасы әлеуметтік желілерде арандатушылық сипаттағы жазбалар мен пікірлердің жиілегеніне байланысты азаматтарға ресми ескерту жасады. Ведомство қоғамда алауыздық туғызуға бағытталған ақпараттарды тарату заңмен қудаланатынын және мұндай әрекеттер үшін әкімшілік әрі қылмыстық жауапкершілік қарастырылғанын мәлімдеді, – деп хабарлайды 7-su.kz ақпараттық порталы.
Қадағалау органының мәліметінше, интернет кеңістігінде ұлттық, әлеуметтік, діни немесе өзге де алауыздықты қоздыруға бағытталған материалдардың таралуы қоғамдық тұрақтылыққа қауіп төндіреді. Осыған байланысты Бас прокуратура азаматтарды әлеуметтік желілерде жарияланатын ақпаратқа мұқият қарауға және тексерілмеген мәліметтерді таратпауға шақырды.
Қазақстан Республикасы Қылмыстық кодексінің 174-бабына сәйкес әлеуметтік, ұлттық, рулық, нәсілдік, тектік немесе діни алауыздықты қоздыру қылмыстық құқық бұзушылық болып саналады. Заңнамада мұндай әрекеттер үшін 2 мыңнан 7 мың айлық есептік көрсеткішке дейін айыппұл салу немесе 2 жылдан 20 жылға дейін бас бостандығынан айыру жазасы көзделген.
Сонымен қатар Қазақстан заңнамасы онлайн-платформаларда заңға қайшы контентті жариялауға және таратуға тыйым салады. Егер жарияланған ақпаратта қылмыстық құқық бұзушылық белгілері анықталмаса, онда кінәлі тұлғалар Қазақстан Республикасы Әкімшілік құқық бұзушылық туралы кодексінің 456-2-бабы бойынша жауапқа тартылуы мүмкін.
Бас прокуратура жалған ақпарат тарату мәселесіне де ерекше назар аударды. Ведомствоның түсіндіруінше, жауапкершілік тек ақпаратты алғаш жариялаған авторларға ғана емес, оны біле тұра таратуға қатысқан азаматтарға да жүктеледі. Сондықтан әлеуметтік желі қолданушылары кез келген мәліметтің шынайылығына көз жеткізбей тұрып оны бөлісуден немесе қайта жариялаудан бас тартуы қажет.
Прокуратура өкілдері қоғамдық келісім, өзара құрмет пен ұлттық бірлік Қазақстанның тұрақты дамуының басты құндылықтары екенін атап өтті. Осыған байланысты азаматтардан арандатушылық сипаттағы материалдарға ермеу, қоғамдық тұрақтылыққа нұқсан келтіруі мүмкін әрекеттерден аулақ болу сұралды.
Ведомствоның мәлімдеуінше, құқық қорғау органдары «Заң мен тәртіп» қағидаты аясында қоғамдық қауіпсіздік пен қоғамдық тәртіпке қауіп төндіретін құқық бұзушылықтардың алдын алу және олардың жолын кесу бойынша заңда көзделген барлық шараларды қабылдауды жалғастырады.
Мемлекеттік орган азаматтарды жауапты ақпараттық мәдениетті ұстануға, ресми дереккөздерге сүйенуге және қоғамдағы татулық пен тұрақтылықты сақтауға үлес қосуға шақырды.
