Қазақстанда ауыл шаруашылығы алқаптарын шегіртке зиянкестерінен қорғау бойынша ауқымды жұмыстар жалғасуда. Ауыл шаруашылығы министрлігінің мәліметінше, бүгінгі күнге дейін республика бойынша 1,3 миллион гектардан астам жерге химиялық өңдеу жүргізілген. Бұл биыл жоспарланған өңдеу жұмыстары көлемінің 62 пайызын құрайды, – деп хабарлайды 7-su.kz ақпараттық порталы.
Үкімет Мемлекет басшысының агроөнеркәсіп кешенін дамыту және елдің азық-түлік қауіпсіздігін қамтамасыз ету жөніндегі тапсырмаларын орындау аясында фитосанитариялық қауіпсіздікті күшейтуге ерекше назар аударып отыр.
Министрлік мәліметіне сәйкес, өңдеу жұмыстары арнайы жүргізілетін фитосанитариялық мониторинг қорытындыларына негізделеді. Химиялық өңдеу зиянкестердің таралу ошақтары анықталып, олардың саны экономикалық зияндылық шегінен асқан жағдайда ғана жүзеге асырылады.
Қазіргі уақытта еліміздің барлық өңірлерінде ауыл шаруашылығы жерлерін зерттеу және бақылау шаралары жалғасып жатыр. Мониторинг пен қорғау жұмыстарына шамамен 3,5 мың маман тартылған. Сонымен қатар өңірлер қажетті мөлшердегі пестицидтермен және техникалық құралдармен толық қамтамасыз етілген.
Шегірткеге қарсы күреске заманауи технологиялар кеңінен қолданылуда. Атап айтқанда, өңдеу жұмыстарына әуе кемелері, 103 пилотсыз ұшу аппараты (дрон) және арнайы жерүсті техникалары жұмылдырылған. Жалпы алғанда, жұмыстарға 556 техника бірлігі қатысуда.
Ауыл шаруашылығы министрлігі еліміздегі фитосанитариялық жағдайдың тұрақты екенін және толық бақылауда тұрғанын хабарлады. Қабылданған шаралардың нәтижесінде шегіртке зиянкестерінің жаппай таралу қаупі едәуір төмендеген.
Соңғы жылдары өңдеуді қажет ететін алқап көлемінің қысқаруы байқалады. Мысалы, 2025 жылы 2,7 миллион гектар жер өңделсе, бұл көрсеткіш 2024 жылмен салыстырғанда 13 пайызға төмен болған. Ал 2026 жылы өңделуі болжанған аумақ 2,2 миллион гектарды құрап отыр. Бұл 2024 жылғы деңгейден шамамен 30 пайызға аз.
Ведомствоның айтуынша, жүргізілген алдын алу және қорғау шараларының арқасында ауыл шаруашылығы дақылдарына айтарлықтай зиян келтірілген жоқ. Шегірткеге қарсы науқанды аяқтау 20 шілдеге жоспарланған.
