Қазақстандықтар үшін маңызды жаңалық жарияланды. Енді Ұлттық куәландырушы орталықтың (ҰКО) жеке кабинетіне кіру кезінде пайдаланушылар екі факторлы аутентификациядан өтуі қажет, – деп хабарлайды 7-su.kz ақпараттық порталы.
«Ұлттық ақпараттық технологиялар» АҚ-ның хабарлауынша, бұл өзгеріс пайдаланушылардың есептік жазбаларының қауіпсіздігін күшейту және дербес деректерді қорғау мақсатында енгізіліп отыр.
Жаңа тәртіпке сәйкес, авторизация кезінде электрондық цифрлық қолтаңбаны (ЭЦҚ) немесе құпиясөзді пайдаланумен қатар, қосымша растау қажет болады. Ол үшін пайдаланушының ұялы телефонына SMS арқылы жіберілетін бір реттік кодты енгізуі немесе eGov Mobile мобильді қосымшасындағы «Жеке куәлік» цифрлық құжатынан алынған кодты көрсетуі керек.
Компания мәліметінше, бұл талап Қазақстан Республикасының резиденті емес азаматтарға қолданылмайды. Себебі олардың телефон нөмірлері Мобильді азаматтар базасында тіркелмеген.
Мамандардың айтуынша, екі факторлы аутентификация есептік жазбаларды қорғаудың тиімді тәсілдерінің бірі болып саналады. Қосымша тексеру кезеңі үшінші тұлғалардың аккаунтқа заңсыз кіруіне жол бермеуге және пайдаланушылардың жеке мәліметтерінің қауіпсіздігін қамтамасыз етуге мүмкіндік береді.
Айта кетейік, Ұлттық куәландырушы орталықтың қызметтері электрондық цифрлық қолтаңбаны алу, жаңарту және басқару процестерінде кеңінен қолданылады. Сондықтан енгізілген жаңа қауіпсіздік шарасы электрондық мемлекеттік қызметтерді пайдалану кезінде қорғаныс деңгейін арттыруға бағытталған.
