Сарыөзек гарнизонындағы 12740 әскери бөлімінің азаматтық персоналдары мен сарбаздары жарты жылға жуық мемлекеттік тілді А1, В1 деңгейі бойынша меңгерді.
А1 деңгейі бойынша сарбаздың әскери ортаға бейімделуіне, командирлердің негізгі бұйрықтары мен әскери жарғының бастапқы талаптарын түсінуіне көмектеседі.
В1 деңгейі бойынша сарбаз бен азаматтық персоналдар құрамы әскери тақырыптағы мәтіндерді оқып, мәнін толық түсінеді, өз ойын жүйелі жеткізе алады.
Емтихан құрылымы екі кезеңнен тұрады. Тақырып бойынша ауызша сөйлеу және лексика-грамматикалық ережелерді қолдану дағдылары бойынша бағаланды.
«Мен Астана қаласының тұрғынымын. Ұлтым – әзірбайжан. Әзірбайжан мен қазақ халқы – тамыры бір, тарихы мен мәдениеті ортақ бауырлас халықтар. Қазақстан әскерінің қатарында қызмет ету – үлкен мәртебе әрі мақтаныш. Қазір ҚР Қорғаныс министрлігіне қарасты 12740 әскери бөлімінде қызмет етудемін. Әскердегі командирлердің бұйрығын мүлтіксіз орындаумен қатар, мен алты ай бойы мемлекеттік тілді үйренуге талпындым. Бүгін мен тек Отан қорғаушы ғана емеспін, сонымен бірге мемлекеттік тілді жүрегімен ұққан, қазақ тілінің мәртебесін көтеруге үлес қосқан сарбазбын. Тіл білу маған жаңа мүмкіндіктерге бағыт береді. Бүгін арнайы куәлік иегері атандым», – дейді қатардағы жауынгер Халид Авакриев.
Жетісу облысының «Тіл» оқу – әдістемелік орталығының ұжымы өзге ұлт өкілдері мен қазақ тілін толық меңгермеген азаматтардың мемлекеттік тілде еркін сөйлеуі бойынша басты назар аударады.
Аталған куәлік әскери жарғы мен бұйрықтарды нақты түсінуіне және әскери қызметтен кейін мемлекеттік қызметке немесе өзгеде жұмысқа орналасуына септігін тигізеді.
А. Шағырбаева,
Жетісу облысы «Тіл» оқу-әдістемелік орталығының Кербұлақ аудандық филиалының оқытушысы
