Ескелді ауданына қарасты Алдабергенов ауылдық округінің Жаңалық ауылы бүгінде қоғамдық келісім мен саламатты өмір салтын ұстанудың жарқын үлгісіне айналып отыр. Тұрғындардың ынтымағы мен ортақ жауапкершілігі ауылдың тыныс-тіршілігін жаңа деңгейге көтеріп, қоғамдық қауіпсіздікті қамтамасыз етуде оң нәтижесін көрсетуде.
Бес жыл бұрын ауыл халқы ортақ келісімге келіп, ішімдік өнімдерінен толықтай бас тарту туралы шешім қабылдады. Осы игі бастаманың нәтижесінде соңғы бес жылда ауылда бірде-бір қылмыс тіркелген жоқ. Бұл – кездейсоқ жетістік емес, тұрғындардың саналы таңдауы мен өзара түсіністігінің, үлкенге құрмет пен кішіге ізеттіліктің нақты жемісі. Оң өзгерістердің негізінде ақсақалдар кеңесінің өнегелі бастамалары, округ әкімдігінің жүйелі қолдауы және құқық қорғау органдарының үйлесімді жұмысы жатыр. Ортақ мақсат жолындағы бірлік ауылдағы қоғамдық тұрақтылықтың берік іргетасына айналды.
Әлеуметтік инфрақұрылымды жаңғырту бағытында да ауқымды жұмыстар жүзеге асырылуда. Соңғы жылдары жаңа медициналық пункт салынып, балалар ойын алаңы, спорт және шағын футбол алаңдары пайдалануға берілді. Көшелер толықтай жарықтандырылып, тұрғындарды көптен бері толғандырған ауызсу мәселесін түбегейлі шешуге бағытталған жаңа су жүйесінің құрылысы қарқынды жүргізілуде. Ауыл шаруашылығының әлеуетін арттыру мақсатында егістік алқаптарын суаруға арналған арналар орнатылып, диқандардың еңбегін жеңілдетуге жағдай жасалды.
Жаңалық ауылының бүгінгі келбеті – ауызбірлік пен адал еңбектің айқын нәтижесі. Тұрғындардың әл-ауқатын жақсартуға, ауылдың көркеюіне бағытталған жұмыстар алдағы уақытта да өз жалғасын тауып, елді мекеннің өркендеуіне серпін бермек.
Еламан АБАЙ,
Ескелді ауданы әкімінің баспасөз қызметі
