Қазақстан Республикасының жаңа Конституциясының күшіне енуі еліміздің қоғамдық-саяси өміріндегі тарихи маңызы зор оқиға. Бұл мемлекеттіліктің мызғымас негізін нығайтып, құқық үстемдігін орнықтыруға, азаматтардың құқықтары мен бостандықтарын қорғаудың жаңа кезеңіне жол ашқан маңызды белес.
Мемлекет басшысының бастамасымен жүзеге асқан конституциялық реформалар Қазақстанның саяси жүйесін жаңғыртып, «Күшті Президент – ықпалды Парламент – есеп беретін Үкімет» қағидатына негізделген мемлекеттік басқарудың жаңа моделін қалыптастыруға серпін берді. Бүгінде Конституция елдің тұрақты дамуының, қоғамдық келісімнің және әділетті қоғам құрудың басты құқықтық тұғыры. Осы маңызды күнге орай Ілияс Жансүгіров атындағы Жетісу университетінде «Конституция – құқықтық мемлекеттің негізі» атты дөңгелек үстел ұйымдастырылды.
Оқу орнының профессор-оқытушылар құрамы, мемлекеттік органдардың өкілдері, заң саласының мамандары қатысқан басқосуда Конституцияның қоғамдағы орны, заң үстемдігін нығайту және елімізде жүргізіліп жатқан саяси реформалардың мәні жан-жақты талқыланды.
Жиынды университеттің Басқарма төрағасы – Ректор, заң ғылымдарының докторы, профессор Ермек Бөрібаев ашып, жиналған қауымды жаңа Конституцияның күшіне ену күнімен құттықтады. Ол өз сөзінде Конституцияның мемлекет пен қоғам арасындағы сенімнің берік кепілі екенін, Ата Заңда айқындалған құндылықтар елдің саяси, әлеуметтік және экономикалық дамуының негізгі бағдары болып қала беретінін атап өтті.
Ректор Мемлекет басшысы Қасым-Жомарт Тоқаевтың әлемнің жетекші жоғары оқу орындарының филиалдарын Қазақстанда ашу жөніндегі тапсырмасы білім беру саласының халықаралық деңгейге көтерілуіне тың серпін бергенін де тілге тиек етті. Осы тапсырма
аясында облыс әкімінің қолдауымен Ілияс Жансүгіров атындағы Жетісу университетінің базасында Италияның Марке политехникалық университетінің филиалы ашылғанын ерекше атап өтті.
Бұл – өңірдің ғана емес, тұтас еліміздің жоғары білім беру жүйесі үшін маңызды оқиға. Жақында Марке политехникалық университетінің ректоры бастаған делегация Жетісуға арнайы келіп, тағы үш бірлескен білім беру бағдарламасына қол қойылды. Соның нәтижесінде филиалда төрт білім беру бағдарламасы жүзеге асырылып, еліміздің барлық өңірінен келген талапкерлер халықаралық стандартқа сай білім алу мүмкіндігіне ие болады. Бұл – Президент тапсырмасының нақты нәтижесі, – деген Ермек Әбілтайұлы халықаралық серіктестіктің жемісті жалғасы ретінде Марке политехникалық университетінің ректоры Энрико Куальяринидің Қазақстан халқына жолдаған арнайы бейнеқұттықтауын көпшілік назарына ұсынды.
Бейнеүндеуде италиялық жоғары оқу орнының басшысы Қазақстан халқын жаңа Конституцияның күшіне енуімен құттықтап, екі ел арасындағы ынтымақтастықтың жаңа белеске көтеріліп келетінін атап өтті.
Құрметті қазақстандық достар! Марке политехникалық университеті атынан және университет ректоры ретінде Қазақстан халқын жаңа Конституцияның күшіне енуімен шын жүректен құттықтаймын. Елдеріңізге бейбітшілік, өркендеу және тұрақты табыс тілеймін. Италия мен Қазақстанды өзара құрметке, сенімге және тиімді ынтымақтастыққа негізделген достық қарым-қатынас байланыстырады. Біз бұл серіктестікті алдағы уақытта да жаңа жобалар арқылы нығайта береміз, – деді Энрико Куальярини.
Келелі жиында сөз алған облыстық Әділет департаментінің басшысы Жандос Бексұлтан Конституцияның құқықтық мемлекет қалыптастырудағы айрықша рөліне тоқталса, облыстық Экономикалық тергеп-тексеру департаментінің аса маңызды істер жөніндегі жедел уәкілі Әлібек Ізбасаров Конституция қағидаттарының экономикалық қауіпсіздікті қамтамасыз етудегі маңызын атап өтті.
Дөңгелек үстелде университеттің факультет декандары да өз ойларын ортаға салып, Конституцияда айқындалған құқықтық мемлекет, адам құқықтары, әділеттілік және азаматтық жауапкершілік қағидаттарының жастар тәрбиесіндегі рөлін жан-жақты саралады.
Сарби ӘЙТЕНОВА
