Алматы қаласында «Қалыптан шығу уақыты келді!» ұрансөзімен өткен ауқымды шарада отандық финтех нарығының көшбасшысы Kaspi.kz өз тарихындағы жаңа инновациялық кезеңді бастады, – деп хабарлайды 7-su.kz ақпараттық порталы.
Компания басшысы әрі негізін қалаушылардың бірі Михаил Ломтадзе Kaspi Магазиндегі әрбір қазақстандыққа арналған жеке AI-көмекші – Kasper сервисін ресми түрде таныстырды. Жаңа бағдарлама сатып алушылардың күнделікті өмірін жеңілдетуге бағытталған бірегей жоба ретінде бағаланып отыр.
Цифрлық сауаттылықты арттыру және заманауи технологияларды тиімді пайдалану мақсатында жасалған бұл құрал онлайн сауда жасау үдерісін түбегейлі өзгертеді. Бұған дейін тұтынушылар қажетті заттарды іздеу үшін кілт сөздерді жазып, жүздеген сипаттамаларды салыстырып, ұзақ пікірлерді оқуға мәжбүр болатын. Ендігі кезекте Kaspi.kz суперқосымшасының қолданушылары өз қажеттіліктерін қарапайым сөзбен ғана жеткізе алады.
Нейрожелі негізінде жұмыс істейтін Kasper жасанды интеллект жүйесі клиенттің сұранысын нақты түсініп, оған бағыт-бағдар береді. Мысалы, сатып алушы «Пәтерге шаңсорғыш таңдауға көмектесші. Үйде кілем, плитка және мысық бар» немесе «Жақсы камерасы мен үлкен экраны бар смартфон керек» деп жазса, ақылды жүйе бірден іске қосылады. Ол нақтылайтын сұрақтар қойып, ең лайықты нұсқаларды ұсынады. Сондай-ақ тауарлардың айырмашылығы мен техникалық ерекшеліктерін техника тілімен емес, қарапайым халыққа ұғынықты сөздермен талдап береді.
Бүгінгі таңда Kaspi Магазин платформасында 106 мың сатушы мен 20 млн тауар шоғырланған. Мұндай үлкен таңдау ортасында тұтынушылардың адасып кетпеуі маңызды. Компания жетекшісі Михаил Ломтадзенің айтуынша, нағыз инновация миллиондаған адамның күнделікті тұрмысына оң әсер етуі тиіс. Жеке көмекші қызметі бұрын тек санаулы адамдарда ғана қолжетімді болса, енді бұл мүмкіндікке әрбір азамат ие болады.
Жаңа өнімнің тағы бір артықшылығы – ол қазақ және орыс тілдерінде еркін сөйлеседі. Пайдаланушылар сұрақтарды мәтін түрінде жазып қана қоймай, дауыстық хабарлама арқылы да жолдауға мүмкіндік алды. Бұл цифрлық ортадағы кедергілерді жойып, технологияның қолжетімділігін арттырады.
Жоспар бойынша, шілде айында Kasper алдымен Алматы қаласындағы тұтынушылар үшін қолжетімді болады. Тәжірибелік кезеңнен өткеннен кейін, инновациялық жүйе біртіндеп бүкіл ел аумағында толықтай іске қосылады. Қазіргі таңда Kaspi.kz сервистерін Қазақстан мен Түркия елдерінде 25 млн астам клиент және 900 мың серіктес белсенді пайдаланатынын айта кеткен жөн.
