«Қазгидромет» РМК синоптиктері 3 шілдеге арналған ауа райы болжамын жариялап, еліміздің басым бөлігінде қолайсыз метеорологиялық құбылыстар болатынын ескертті, – деп хабарлайды 7-su.kz ақпараттық порталы.
Синоптиктердің мәліметінше, көптеген өңірде жаңбыр жауып, найзағай ойнайды. Кей жерлерде нөсер жаңбыр, бұршақ, дауыл соғып, желдің екпіні секундына 23-28 метрге дейін күшеюі мүмкін. Сонымен қатар бірқатар облыста жоғары және төтенше өрт қаупі сақталады.
Қолайсыз ауа райы Қарағанды, Ұлытау, Алматы, Солтүстік Қазақстан, Маңғыстау, Ақтөбе, Абай, Шығыс Қазақстан, Атырау, Батыс Қазақстан, Жамбыл, Түркістан, Павлодар, Қызылорда, Қостанай, Ақмола және Жетісу облыстарын қамтиды. Сондай-ақ Астана, Алматы, Шымкент, Талдықорған, Қонаев, Петропавл, Өскемен, Семей, Қарағанды, Ақтөбе, Қызылорда, Павлодар, Қостанай, Көкшетау, Жезқазған және Тараз қалаларында да жаңбыр, найзағай, бұршақ пен екпінді жел болады.
Абай және Шығыс Қазақстан облыстарында күндіз ауа температурасы 35-37 градусқа дейін көтеріліп, қатты ыстық болады. Түркістан мен Қызылорда облыстарының жекелеген аудандарында, сондай-ақ Абай облысының оңтүстігінде шаңды дауыл болжанып отыр.
