Бүгінде мемлекет тарапынан әлеуметтік саланың дамуына барынша басымдық берілген.
Президент Қасым-Жомарт Тоқаев Қазақстан халқына арнаған Жолдауында көпбалалы және ерекше қажеттілігі бар адамдарға қолдау көрсетуге, сонымен қатар тұрғындардың өмір сүру сапасын арттыруға ерекше көңіл бөлді. Облысымызда аталған сала бойынша қабылданған мемлекеттік бағдарламаларды жүзеге асыру тиісті деңгейде орындалуда. Көрсетілген қызмет сапасын одан әрі жақсартуда тұрақты жұмыстар жүргізіліп келеді.
Осы жылы облыста халықты әлеуметтік қорғау және мүгедектігі бар адамдардың өмір сүру сапасын жақсартуға бағытталған бірқатар жұмыс атқарылды. Арнаулы әлеуметтік қызмет көрсетуге арналған 1566 орынды 13 мемлекеттік мекемеде (алтауы стационар, жетеуі жартылай стационар жағдайында) барлығы 1401 адамға арнаулы әлеуметтік қызметтер көрсетілді.
Облыста республикамызда алғашқы болып 18 жастан асқан қызмет алушыларға 50 орынды стационар жағдайында арнайы бөлімше ашылып, жұмысын бастады. Сонымен қатар, желтоқсан айында мүгедектігі бар адамдар күніне орай Панфилов ауданы, Жаркент қаласында ерекше қажеттілігі бар балаларға арналған тұңғыш «Иппотерапия» орталығы ашылды. Жыл басында зейнеткерлік жастағы азаматтарға сапалы қызмет көрсету мақсатында алғаш рет Талдықорған қаласында мемлекеттік мекеме нысанында «Белсенді ұзақ өмір сүру орталығы» ашылды.
Биылғы жылдың 14 маусымында Қазақстан Республикасы Мәдениет және ақпарат министрінің №256-НҚ бұйрығымен «Отбасын қолдау орталықтарының қызметін жүзеге асыру қағидалары» бекітілді. Осыған орай Жетісу облысында «AMANAT» партиясының 2023 – 2027 жылдарға арналған сайлауалды бағдарламасын іске асыру жөніндегі Жол картасы аясында «Жанұя» «Отбасын қолдау орталықтары» Текелі қаласында, Панфилов және Сарқан, Алакөл, Қаратал, Кербұлақ аудандарында ашылды. Ал 2025 жылы Ескелді, Көксу, Ақсу аудандарында ашылады.
Өңірдің әлеуметтік қорғау жүйесінде 2 мыңнан аса адам еңбек етсе, оның 500-ге жуығы әлеуметтік қызметкер.
Сарби ҚАСЫМБЕКҚЫЗЫ
