Ұлттық банк төрағасының орынбасары Әлия Молдабекова 2025 жылы еліміздегі балаларға Ұлттық қордан жоғары мөлшерде төлемдер түсетінін мәлімдеді.
Келесі жылдың қаңтар айында балалардың есепшоттарына 2024 жылмен салыстырғанда көбірек сома түседі. Молдабекованың айтуынша, 2025 жылы әр балаға орташа төлем мөлшері шамамен 128 долларға (қазіргі курспен 66 304 теңге) тең. Бұл 2024 жылмен салыстырғанда 28 долларға артық. Өсім ұлттық қордың инвестициялық табысының жақсы нәтижелерімен түсіндіріледі. Он айдың ішінде Ұлттық қордың инвестициялық табысы 5,3 миллиард доллар болды.
Ұлттық банк төрағасы Тимур Сүлейменовтің айтуынша, осы соманың жартысы балаларға арналған төлемдерге жұмсалады. Осылайша, соңғы жылдардағы жақсы инвестициялық нәтижелердің арқасында төлем сомасы артады.
Ұлттық банктің мәліметінше, төлемдер Ұлттық қордың активтерінің соңғы 18 жылдағы орташа жылдық табысының 50%-ы мен қордың таза валюталық активтерінің нарықтық құнына көбейтілген көрсеткіш негізінде есептеледі. 2024 жылы Ұлттық қордың валюталық активтері шамамен 60 миллиард долларға жетті. Ал соңғы 18 жылдағы орташа жылдық табыс 3%-ға тең. Сөйтіп, келесі жылы шамамен 7 миллион бала өз төлемдерін алады. Бұл 900 миллион долларға шамалас.
Айта кетейік, биыл 1 қаңтардан бастап Қазақстанның барлық кәмелетке толмаған азаматтарына жыл сайын Ұлттық қордың инвестициялық табысының 50%-ы есептеледі.
Фото коллаж: Azattyq Rýhy
