Оқу жылының басталуына бір айға жуық уақыт қалды. Ата-аналар мектеп формасы, оқу құралдарын алып, балаларын мектепке даярлауда. Бірақ тұрмысы төмен, көпбалалы отбасылар балаларын мектепке дайындай алмай қиналатын жағдайлар да жиі кездеседі. Осындай келеңсіздіктің алдын алу мақсатында елімізде «Мектепке жол» акциясы өткізілуде.
Бұл акция аз қамтылған және көпбалалы отбасылардың оқушыларына көмек көрсетуге және әлеуметтік себептер бойынша балалардың мектепке бармауының алдын алуға бағытталған. Игі шара Қаратал ауданында да қызу жүргізілуде.
Жуырда Үштөбе қаласының орталығы автобекет алаңында жәрмеңке ұйымдастырылып, мектеп тауарлары төмендетілген бағамен сатылды. Жәрмеңкеге жомарт жандар үлес қосып, 220 аз қамтылған, көпбалалы, жетім және ата-анасының қамқорлығынсыз қалған балаларға материалдық қолдау көрсетті. Жалпы көмек сомасы 7 700 000 теңгені құрады.
Дәстүрге айналған жоба көптеген отбасының мектепке даярлық жұмыстарын жеңілдетуге сеп болып отыр. Көмек алуға үмітті ата-аналар мен балалар тізімі бекітілді. Қыркүйек айының соңына дейін 750 бала оқуға қажетті құрал-жабдықтармен, мектеп формасымен қамтылмақ.
Акция 30 қыркүйекке дейін жалғасады. Мамандардың айтуынша, аудан орталығының ірі сауда орындарында мектеп тауарларын төмендетілген бағамен сататын жәрмеңке жиі өткізіледі. Балаларға мейірім мен шуағын төге келетін акцияның көпшілік көмегімен өз дәрежесінде өтеріне сеніміміз мол.
Айдар ҚАЛИЕВ
