Баспаналы болу – бір бақыт. Үшарал қаласында 60 пәтерлі көпқабатты тұрғын үйдің кілті тұрғын үй кезегінде тұрған азаматтарға табысталды.
Аудан бойынша тұрғын үй кезегіне 4 санат бойынша 1653 азамат тіркелген. 5 қабаттан тұратын 60 пәтерлі жалдамалы тұрғын үйдің (бір бөлмелі 30, екі бөлмелі 15, үш бөлмелі 15 пәтер) кілті әлеуметтік жағынан аз қамтылған және жылдар бойы пәтер кезегінде тұрған отбасыларға табысталды. Заманауи үлгіде бой көтерген баспананы мердігер «Қайнар АКБ» ЖШС салды. Баспаналы болу бақытына ие болған аудан тұрғыны, көпбалалы ана Гүлайым Шакенова :
– Тұрғын үй кезегінде тұрғаныма 5 жылдан астам уақыт болды. Осы күнге дейін 5 баламен жалдамалы үйде тұрып келдім. Міне, бүгін тұрғын үй кезегімен өзіміздің жеке жаңа, заманауи тұрғын үйдің кілтін иеленіп жатырмыз. Қуанышымда шек жоқ, – деп ризашылығын жеткізді.
Қоныстойын тойлап жатқан тұрғындардың арасында отбасылық өмірге жаңа аяқ басқандар да, зейнет жастағы қариялар да бар. Айта кетейік, аудан халқының әлеуметтік ахуалын жақсарту, тұрғын үймен қамтамасыз ету мақсатында тұрғын үй кезегінде тұрған халықтың әлеуметтік осал топтарындағы аудан тұрғындарына 60 үй және Қабанбай ауылында жас мамандарға арналған 10 жеке тұрғын үйдің құрылыс жұмыстары басталып, жыл соңына дейін қолданысқа беріледі деп жоспарлануда.
Айжан МҰРАТ
Алакөл ауданы
