Өткен жылдың көктемінде Жаркент қаласында мемлекеттік қолдау аясында жергілікті іскер әйелдер қауымдас- тығының ұйытқы болуымен жұмыссыз жүрген қыз-келіншектерді кәсіпкерлікке баулитын «Раушан» оқу орталығы құрылған. Мұнда ауылда екі қолына істейтін кәсіп таппай жүрген әйелдер шаштараз, аспаз, тігінші мамандықтары бойынша үш айлық курста оқытыла бастады. Бұл орталыққа аудандағы іскер әйелдер қауымдастығының мүшесі, аудандық мәслихаттың депутаты Раушан Оспанова жетекшілік жасап, ауылдағы әйелдер арасындағы жұмыссыздыққа күресті бастап кетті.
Оқу орталығы халықты еңбекпен қамту бағдарламасы негізінде ашылып, бүгінде 160 маман өз кәсібін ашуға және жаңа тұрақты жұмыс орнын табуға жолдама алды. Олардың көпшілігі оқу барысында кәсіпкерлік қағидаттарын меңгеріп, өздерінің жеке бизнес-жоспарларын жасап, ауылдарында жеке кәсіпорындарын да ашып үлгерді. Мысалы, осы орталықтан арнайы мамандық алған арулар өңірдегі Еңбекші ауылынан «Сая» шаштаразын, «Аружан» атты тігін шеберханасын, сол сияқты Тұрпан ауылынан «Інжу» тігін цехын ашты.
Бұл жаңа жұмыс орындарының бәрі Ұлттық жоба аясында жүзеге асуда. Оқу орталығына барғанымызда бізді қарсы алған Раушан Жамбылбайқызы сабақ өтіп жатқан үш сынып бөлмесін аралатып көрсетті. Олардың алғашқысында болашақ аспаздар, екіншісінде шаштараз кәсібін таңдағандар, үшіншісінде тігіншілер ұстаз сабағына ынтамен ден қойғанын байқадық.
– Оқу орталығын ашу жөніндегі ой 2022 жылы туындады, – дейді Раушан Жамбылбай- қызы. – Алайда оны қаржыландыру, оқу орнын жалдау, стипендия төлеу мәселелері аяққа тұсау болып, мақсатымызға өткен жылы қол жеткіздік. Алғашқы жылы орталыққа ауылдардан жиналған 83 әйел мамандық алса, биыл 88 адам ауылға қажет кәсіпті меңгерді. Оқушыларымызға шәкіртақыдан басқа жол қаражатын төлейміз. Оларды жұмысқа орналастыру мен тігін машиналарын сатып алуына, жеке кәсіпорнын ашуына көмектесеміз. Бізде әйелдермен қатар жаңа мамандық алуға ынталы ер адамдарға да орын бар. Биыл білім алған 88 тыңдарманның екеуі ер кісілер. Жұмыс берушілермен келісе отырып болашақ еңбек орнын да дайындап қоямыз. Біздің өңірде аспаздар мен тігіншілерге, шаштараздарға сұраныс жоғары. Сондықтан біз даярлаған мамандар түгел тұрақты жұмыс орындарын тауып келеді.
Жұмыста немесе бизнесте өзіміз даярлаған мамандардың іс-қимылын жарты жыл бойы бақылап, аяғынан нық тұрғанша қамқорлығымызға алып, басшылық жасаймыз. Оқу кезеңінде де олардың қиындықтарға төзімділігін, іскерлік қасиеттерін шыңдаймыз, – дейді орталық басшысы.
Оқу орталығының жетекшісі болашақта бүгінгі қоғамға өте қажет мобилограф, бағдарламашы, балабақшадағы тәрбиешілердің көмекшісі сияқты мамандықтарды оқу жүйесіне енгізбек. Бір сөзбен айтқанда, Жаркент қаласында ашылған оқу орталығының болашағы ауқымды. Сонымен қатар, бұл орталық жұмыссыздықпен күресті орайластыру арқылы аудан экономикасының өркендеуіне де елеулі үлес қосып отырғанын байқау қиын емес.
М. Манапұлы
