Тұрмыста қолданылатын сәнді ыдыс сапасы жоғары кептірілген ағаштан жасалады.
Бүгінде экоөнімге сұраныс көп. Қазақ ағаштан жасалған астауды әу бастан-ақ пайдаланған. Оған ет, палау, бас сияқты тағам түрлерін салып, сыйлы қонақтарға ұсынған. Бұл ыдыстың басты ерекшелігі сол – табақтағы ыстық ас суымай, ұзақ уақытқа балғындығын сақтайды. Сонымен бірге мерекелік дастарқанның сәнін келтіріп, ұлттық нақышта көрініс береді.
«KormHub» жеке кәсіпкерлігі 2020 жылдан бастап жұмыс істеп келеді. Жетекшісі Ернар Жексеновтың айтуынша, ол ағаштан бұйым жасауды бала кезінен ұнатқан. Сөйтіп, қызығушылығы артып, кейіннен осы іспен айналысуға бел буыпты. Ол алғашында ағаш ойып, түрлі мүсін шығарған. Кейіннен астау жасау туралы ой келіп, оны жүзеге асыруды мақсат тұтқан.
Осылайша «Банк ЦентрКредит» АҚ-ға жүгініп, ағаш өңдейтін жабдық сатып алу үшін несиеге қол жеткізеді. Жобаны субсидиялау және кепілдік беру құралдары бойынша «2021-2025 жылдарға арналған кәсіпкерлікті дамыту жөніндегі ұлттық жобаның» 1-бағыты шеңберінде «Даму» қоры қолдау танытқан.
Нәтижесі көңіл қуантады. Бүгінгі таңда шеберханада жылына 5 мыңнан аса дайын өнім шығаратын тәжірибелі шеберлер жұмыс істейді. Дайын өнімдер ұлттық нақышта безендіріліп, ыдыс-аяқ дүкенінде саудаланады.
А. Ыбырай
Көксу ауданы
