Әрбір баланың сапалы білімге тең қолжетімділігін қамтамасыз ету – қоғамның басты басымдығының бірі. Осы мақсатта қала мен ауыл арасындағы білім беру сапасындағы алшақтықты азайтуға бағытталған маңызды жоба облыста жүзеге асуда. Игілікті шара Талдықорғандағы Құлжабай Қасымов атындағы №28 ІТ мектеп-лицейінде ұйымдастырылды.
Жетісу облысының шалғай аймақтарында орналасқан 41 шағын жинақты мектепке «Алматыкітап» баспасы тарапынан «TopIQ-Mobil Box» мобильді білім беру станциялары табысталды. Бұл бастама TopIQ.kz білім беру платформасын кеңінен қолдану арқылы ауыл мектептерінде цифрлық білім беру технологияларына қолжетімділікті арттыруға бағытталған.
Аталған жоба Қазақстан Республикасы Президенті ұсынған елді цифрландыру бастамасын қолдау мақсатында жүзеге асырылып отыр. Оның негізгі мақсаты – білім алушыларға заманауи білім беру ресурстарын тең дәрежеде ұсыну және олардың цифрлық сауаттылығын дамыту.
Алакөл ауданына қарасты шалғай жатқан Қайнар орта мектеп директоры Қарлығаш Қозыбаева бұл бастаманың маңызын ерекше атап өтуде.
«TopIQ-Mobil Box – біздің оқушылар үшін үлкен мүмкіндік. Интернеті әлсіз, ресурсы шектеулі ауыл мектебі үшін бұл станция цифрлық білімге ашылған жаңа есік іспетті. Оқушылардың сабаққа деген қызығушылығы артып, мұғалімдердің де жұмысын жеңілдетеді», – дейді мектеп директоры.
Ал Жетісу облыстық әдістемелік орталығының директоры Ғалия Мухметова да жобаның білім сапасын арттырудағы рөліне тоқталды:
«Бұл жоба – тек техника жеткізу емес, бұл – ауыл мен қала мектебі арасындағы білім алшақтығын азайтуға бағытталған нақты қадам. TopIQ.kz платформасы арқылы оқушылар заманауи цифрлық контентке қол жеткізіп, мұғалімдер әдістемелік тұрғыдан жаңа мүмкіндіктерге ие болуда», – деп атап өтті ол.
Осындай игі бастамалар Жетісу өңіріндегі білім беру жүйесінің дамуына тың серпін беріп, әрбір балаға сапалы білім алуға тең мүмкіндік жасайтыны сөзсіз.
Медет ЖҰМАБАЙ
