Жетісуда Балқаш көліне дейінгі 132 шақырым жолдың құрылысы келесі жылғы шомылу маусымы басталғанға дейін толық аяқталады.
Мемлекет басшысының Жетісу облысына келген жұмыс сапары барысында берген тапсырмасын іске асыру бағытында Балқаш көліне дейінгі жалпы ұзындығы 132 шақырымдық жолда, яғни «Лепсі-Балқаш көлі» (27 км) және «Молалы-Лепсі-Ақтоғай» учаскесінде (105 км) құрылыс жұмыстары жүргізілуде. Бұл – облыстағы инфрақұрылымды дамытудың басты жобасының бірі. Жыл соңына дейін аталған жол төменгі асфальт жабынымен көлік қозғалысы үшін ашылады деп жоспарланған. Ал асфальттың беткі қабаты мен абаттандыру жұмысы толығымен келесі жылы аяқталады.
Жетісу облысы әкімінің баспасөз қызметінің хабарлауынша, қазіргі кезде Лепсі ауылынан Балқаш көлінің жағалауына дейінгі 27 шақырым автокөлік жолының қайта жаңғырту жұмысы аяқталып, қолданысқа берілді. Ал «Молалы-Лепсі-Ақтоғай» учаскесіндегі 105 шақырымда құрылыс жұмысы жүріп жатыр. Соның ішінде 71 шақырымына екі қабат асфальт төселді, қалған 34 шақырымындағы жұмыс жыл соңына дейін аяқталмақ. Сонымен Балқашқа апаратын жол төменгі жабынымен автокөлік құралдары үшін жол ашылады. Ал беткі қабаты мен жол жиегін абаттандыру, жол белгілері, жол сызықтары, металл тосқауылдар, демалыс аймағы, санитарлық бекет орнату секілді жұмыстар келесі жылдың жазғы шомылу маусымына дейін толық аяқталады.
– Қазір құрылысқа 90-ға жуық арнайы техника жұмылдырылған. 25 адам асфальт жамылғысын салуға, 50 адам жер төсемі жұмысында, тағы 50 адам зауыттағы асфальт дайындау, ұнтақтау, материалдарды өңдеу, тасымалдауға жұмылған. Жалпы саны 130-ға жуық адам жұмыс істеп жатыр. Лепсі ауылынан Балқаш жағалауына дейінгі жолдың бастапқы ені 6 метр болса, жаңғыртылғаннан кейін 8 метрге ұлғайтылды, ал 105 шақырымының ені 7-ден 9 метрге кеңейеді. Сонымен қатар, жобада 67 дана су өткізу құбыры толығымен ауыстырылып, екі көпір салынды. Жоба іске асырылғанға дейін осы жолмен қатынайтын жол көліктерінің ағыны тәулігіне 3 мың автокөлік болса, қайта жаңғыртудан кейін бұл көрсеткіш 6 мыңға өспек. Бұл туристік аймақты дамытуға басты серпін беретін жоба болып отыр, – дейді облыстық жолаушылар көлігі және автомобиль жолдары басқармасы басшысының орынбасары Айдос Досжанов.
Бұл ретте жобаны іске асыру барысында құрылыс құнының қымбаттауына байланысты облыс әкімі Бейбіт Исабаевтың тапсырмасына сәйкес Балқашқа дейінгі жол салу жұмысына облыстық бюджеттен қосымша 15,9 млрд. теңге қаржы бөлінді. Соның 5,5 млрд. теңгесі биылға бөлінді, қалған қаражат келесі жылы беріледі. Балқаш көліне дейінгі жол құрылысы жобасының жалпы құны 30,4 млрд. теңге.
Жалпы биыл облыстың жол саласын дамытуға 37,9 млрд. теңге қаражат бөлінді. Осы қаражатқа облыстық маңызы бар автокөлік жолдарын жөндеуге арналған 29 жоба іске асырылып, 54 елді мекеннің ішкі көшелері жөнделеді.
Сол сияқты облыс аумағында республикалық маңызы бар ірі жобалар да іске асырылуда. Үшарал-Достық жолы іске қосылды және бүгінгі күнге Талдықорған-Үшарал автожолын жөндеу 95 пайызға орындалды, нысан толығымен жыл соңында аяқталады деп жоспарланған. Сондай-ақ Сарыөзек-Көктал, Жаркент-Қорғас автожолдары жөндеуден өтуде.
«Jetіsý-ақпарат»
