Биыл Жетісу облысында өңірдегі 1-10 сынып оқушыларының 102,7 мыңы немесе 85% жазғы сауықтырумен қамтылады деп жоспарланған, — деп хабарлайды Жетісу облысы әкімінің баспасөз қызметі.
Облыстық білім басқармасының мәліметіне қарағанда, өңірде қала сыртындағы 10 лагерьдің 9-ы жұмыс жасайды деп күтілуде. Ал Ескелді ауданында орналасқан «Айналайын» балалар үйінің лагеріне күрделі жөндеу жұмыстары басталды.
«Жалпы 2024 жылы жазғы демалыс кезінде облыстағы 1-10 сыныптарындағы 121 166 оқушының 102 700-і немесе 85% жазғы демалыспен қамтылады. Оның ішінде әлеуметтік осал отбасынан шыққан 8277 бала жергілікті бюджеттен қаржыландырылатын қала сыртындағы лагерлерге, 93 223-і мектеп жанындағы тамақтандырылмайтын 308 лагерде, 1200-і Текелі қаласындағы спорттық лагерьде демалады. Сонымен қатар 19 820 бала туристік саяхаттармен, 18 998 бала интеллектуалды шыңдаумен, 46 507 оқушы еңбекпен, 32 700 бала шығармашылық үйірмелермен қамтылады.
Жаз мезгілінде 222 бала Щучинск, Қонаев, Түркістан қаласындағы «Балдаурен», Алматы қаласындағы «Бөбек» оқу-сауықтыру орталықтарына демалады.
Оған қоса республикалық бюджет қаражаты мен «Қазақстан Халқына» қорының есебінен де балалар демалысы ұйымдастырылады», — делінген басқарманың хабарламасында.
