Ақсу ауданының Қаныш Сәтбаев атындағы орта мектеп-гимназиясына күрделі жөндеу жұмысы жүргізілуде. Іргетасы 1967 жылы қаланған қара шаңырақ 1200 балаға білім беруге арналған.
Ғимаратқа күрделі жөндеу жұмыстарын «Нұр-Шапағат-Құрылыс» жауапкершілігі шектеулі серіктестігі қолға алған. Аудандық білім бөлімінің басшысы Айдынбек Құмарбекұлының айтуынша, ауданда 33 жалпы білім беретін мектеп, 7 балабақша, 2 қосымша білім беру ұйымы, 2 колледж бар. Мектептерді жаңарту жұмыстары кесте бойынша жыл сайын кезең-кезеңімен іске асырылуда. Жансүгіров ауылында Жүрімбек Сыдықов атындағы орта мектептің ғимараты күрделі жөндеуден өткен. Қапал ауылындағы Ғали Орманов, Ақсу ауылындағы Мамания, Жаңалық ауылындағы Жаңатілеу орта мектептеріне ағымдағы жөндеу жүргізілген. Көшкенталдағы 180 балаға арналған және мектепке дейінгі шағын орталығы бар мектеп қолданысқа берілді. Аудандағы Мәншүк Мәметова, Сағабүйендегі Саз мектебі ағымдағы жөндеуден өткізілді.
Биыл Көкжайдақ, Қосағаш, Қаракемер ауылдарындағы білім шаңырақтары, Матайдағы «Кәусар», Қапалдағы «Бөбек» балабақшалары жөндеуден өткізіледі деп жоспарлануда. Арасандағы Барлыбек Сырттанов орта мектебіне күрделі жөндеуге, Еңбек ауылындағы Қарасу орта мектебін жөндеуге жобалық-сметалық құжат жасалуда. Барлық мектепке заманауи құрал-жабдық алынады. Былтыр 7 білім шаңырағына модификациялық құрылғылар орнатылған. Тағы 8 мектепте жаңа көрнекілік құралдар, оқыту жабдықтары жаңартылады. Көлтабанда жаңа модификациялық сынып жасалмақшы. Мердігер компанияның басшысы Қайрат Кереевтің айтуынша, нысанның демонтаждық жұмыстары толық аяқталып, ғимараттың қабырғалары қалыңдатылуда. «Қазіргі уақытта құрылыс алаңында 130 адам жұмыс істеуде. Олардың 33-і жергілікті жердің азаматтары.
Нысанға сейсмокүшейту шаралары жасалуда. Сондай-ақ, бөлмелердің арасын бөлу, кірпіш қалау, электр жүйесін тарту, іргетасын сейсмикалық күшейту жұмыстары жүргізілуде. Күрделі құрылыс жұмысымен танысуға барғанда 1 кран, 2 «КамАЗ», 2 жүк тиейтін техника тоқтаусыз жұмыс істеп жатқанын көрдік. Шатырға жабатын материалдар үй төбесіне шығарылыпты, оларға қолданылатын ағаштардың отқа төзімділігін арттыру үшін арнайы сұйықтықпен антисептикалық өңдеу жұмыстары жүргізілуде. Жалпы құрылыс қарқыны жақсы.
Тапсырыс беруші білім бөлімінің басшылары құрылыс барысын қадағалауда. Мердігер компания жұмысты сапалы, кестеге сай атқаруда. Аудан басшыларының айтуынша, күрделі құрылыс жұмысы осы қарқынмен жүргізілсе пайдалануға уақытынан ертерек берілмекші.
Гүлжан ТҰРСЫН
Ақсу ауданы
Суреттерді түсірген Жұмабай МҰСАБЕКОВ
