Ауданда көктемгі дала жұмыстары белгіленген жоспарға сәйкес уақытылы басталып, жүйелі түрде жүзеге асырылуда. Бүгінде егіс науқаны барлық бағыт бойынша қарқын алып, агротехникалық шаралар кезең-кезеңімен орындалуда.
Көктемгі дала жұмыстарының алғашқы әрі маңызды кезеңдерінің бірі – ылғал жабу толық көлемде атқарылды. Биыл бұл жұмыс 18 100 гектар алқапта жүргізіліп, жоспар 100 пайызға орындалды. Сонымен қатар, себу алдындағы өңдеу – тырмалау 11 295,4 гектар жерде жүзеге асырылып, бұл бағыттағы міндеттер де толық орындалды.
Қазіргі таңда жер жырту жұмыстары жалғасуда. Жалпы 24 122 гектар жерді жырту жоспарланса, бүгінгі күнге дейін оның 18 600 гектары игеріліп, орындалу деңгейі 77,1 пайызды құрады. Бұл көктемгі науқанның тұрақты әрі үйлесімді жүргізіліп жатқанын көрсетеді.
Жаздық дәнді масақты дақылдарды себу жоспарға сай кезең-кезеңімен іске асырылуда. Бүгінде 20 007 гектардың 9 755 гектарына дән себіліп, орындалу көрсеткіші 48,8 пайызға жетті.
Жоспарға сәйкес биыл жүгері 3 505,3 гектарға, майлы дақылдар 12 800 гектарға, көкөніс және бақша дақылдары 1 032,9 гектарға, азықтық дақылдар 5 706 гектарға орналастырылады.
Бұл көрсеткіштер ауыл шаруашылығы саласын әртараптандыруға және өнім көлемін арттыруға бағытталған.
Ауыл шаруашылығы саласында еңбек ететіндердің сөзінше, көктемгі егіс науқаны – ең маңызды кезеңдердің бірі. Қазіргі жұмыс қарқыны жаман емес, барлық шара жоспар аясында орындалуда. Ең бастысы – ауа райының қолайлы болуы. Бірлескен еңбек пен жауапкершіліктің арқасында биыл да жақсы өнім алуға негіз бар.
Көктемгі дала жұмыстарының белгіленген жоспарға сай жалғасуы еңбек адамдарының жүйелі ісі мен ортақ мақсатқа деген жауапкершілігінің айғағы.
Еламан Абай,
Ескелді ауданы әкімінің баспасөз хатшысы
