Қазақстандық жоғары оқу орындары Қытайдың жетекші университеттерімен білім беру саласындағы ынтымақтастықты кеңейтіп жатыр. ҚР жоғары оқу орындарының өкілдері Қытай Халық Республикасының бірқатар беделді университеттеріне жұмыс сапарымен барып, бірлескен жобаларды талқылады.
Сапар аясында Ualikhanov University халықаралық ынтымақтастық жөніндегі проректоры Жайлагүл Сағындықова және Satbayev University халықаралық ынтымақтастық және стратегиялық даму жөніндегі бірінші проректоры Самғат Ермекбаев Dalian Polytechnic University және Beijing University of Chinese Medicine университеттерінің басшылығымен ресми кездесулер өткізді.
Dalian Polytechnic University алаңында өткен келіссөздер барысында тараптар 2026 жылдан бастап инженерия және тағам өнеркәсібі бағыттары бойынша қос дипломды білім беру бағдарламаларын іске қосу туралы келісімге келді. Ал Beijing University of Chinese Medicine университетімен өткен кездесуде Ualikhanov University Жоғары медицина мектебі бағдарламасы аясында профессорлық-оқытушылар құрамы мен студенттердің академиялық ұтқырлығын дамыту, сондай-ақ қос дипломды бағдарламаларды әзірлеу мәселелері талқыланды.
Dalian Polytechnic University – өңірдегі жетекші мемлекеттік техникалық жоғары оқу орындарының бірі. Мұнда 20 мыңнан астам студент білім алады және университет әлемнің 100-ден астам жоғары оқу орнымен серіктестік байланыс орнатқан. Оқу орны инженерлік бағыттар, жеңіл және тағам өнеркәсібі, тағамтану, тоқыма және дизайн салалары бойынша маманданған.
Ал Beijing University of Chinese Medicine Қытайдағы дәстүрлі қытай медицинасы саласындағы жетекші профильдік университеттердің қатарына жатады. Университет QS World University Rankings 2026 рейтингінде 1201-1400 орындарында, QS Asia University Rankings рейтингінде 441-450 орындарында орналасқан.
Жаңа бірлескен білім беру бағдарламаларының іске қосылуы қазақстандық студенттерге халықаралық академиялық тәжірибе алуға, білім беру деңгейін арттыруға және кәсіби құзыреттерін кеңейтуге мүмкіндік береді.
«Жетісу-Ақпарат»
