Дана халқымыз «үйі жоқтың күйі жоқ» деп бекер айтпаса керек. Сондықтан, әр адам өзін бақытты сезініп, алаңсыз өмір сүруі үшін алдымен оның тұрақты жұмысы, мекенжайы болуы тиіс. Ол, әрине өз үйің, кең сарайдай боз үйің. Онда ішкен қара шайың да сіңімді, бір тілім нанның да дәмі ерекше болатыны рас.
Үкімет халықтың осындай жақсы жағдайға қол жеткізіп, уайымсыз өмір сүруі үшін бар мүмкіндікті жан-жақты қарастырып, ойластыруда. Нәтижесі жаман болып жатқан жоқ. Оған аймағымыздың әр өңірінде бой көтеріп жатқан жаңа ғимараттар мен тұрғын үйлерді дәлел ретінде айтуға болады. Бірінен соң бірі салынып жатқан заманауи үлгідегі нысандар өзінің өзгешелігімен алыстан менмұндалап, көз тартады.
Ал оған қол жеткізу – кім-кімнің де ішкі арманы екені ақиқат. Көңілге қонымды мұндай үрдіс Жетісу жерінде де ретімен жалғасып, жыл сайын жандануда. Мәселен, биылғы он бір ай ішінде барлығы 283,7 мың шаршы метр тұрғын үй қолданысқа беріліп, талай адамның баспаналы болу бақытына қол жеткізді. Осылайша, құрылыс жұмыстары 1,4 есеге орындалып, бұған 262,8 млрд. теңге қаражат жұмсалды.
Айта кетейік, жалпы биыл 56 көпқабатты және 214 жеке тұрғын үй құрылысын жүргізуге 7,6 млрд. теңге қаржы бөлінді. Бұдан бөлек, 15,9 млрд. теңгеге халықтың әлеуметтік осал топтары үшін 866 пәтер сатып алынды. Сонымен бірге апатты баспаналардың мәселесін шешуге де ерекше назар аударылуда.
Өткен жылдың басында облыста 348 пәтер апатты деп танылып, 1,3 млрд. теңгеге 137 пәтер, ал биыл жергілікті бюджеттен қарастырылған 2,4 млрд. теңгеге Кербұлақ ауданында – 60, Текелі қаласында – 48, Талдықорғанда – 47, барлығы 155 жаңа пәтер сатып алынды. Бұған қоса, «Самұрық-Қазына» ұлттық әл-ауқат қоры акционерлік қоғамы демеушілерінің есебінен 560 пәтерлі 9 үй салынып жатыр.
Осының бәрі жаздың аптап ыстығы мен қыстың қаһарлы суығына қарамастан бел жазбай еңбектеніп жатқан құрыш қолды құрылысшылар еңбегінің нәтижесі екені анық. Сондықтан олардың әрқайсысы қандай құрметке де лайық деуге негіз бар.
Айгүл Байжұмақызы
