Сарқан ауданында Балқаш көлінің жағалауын дамыту мақсатындағы жұмыстар қарқын алды. «Балқаш туристік-рекреациялық демалыс аймағының инженерлік-коммуникациялық желісін салу» нысанының жалпы құны 7,2 млрд. теңгені құрайды. 2024 жылға 2,1 млрд. теңге қаражат бөлініп, жұмыстар бастау алды.
«Туристік әлеуеті жоғары Балқаш көлі жағалауын дамытудың алғашқы қадамы жасалып, ауқымды жұмыстар жүргізілуде. Туристер мен инвесторларды тартуға қолайлы жағдай жасау біздің басты міндет. Алдағы уақытта 16,3 шақырымды құрайтын жағалау аймағы туристерге қолайластырылып, жағалаудағы демалыс аймақтары ауызсумен, электр желісі және кәріз жүйесімен қамтылады. Бүгінгі күнге электр желісін Лепсі ауылынан, ал ауызсу жүйесін Көктерек ауылынан тартып жатырмыз», – дейді аудан әкімі Ғалымжан Қанатұлы.
Айта кетейік, Балқаш көлінің жағалау аймағын егжей-тегжейлі жоспарлау жобасын «Казгипроград» 1 жобалау институты әзірлеуде. Аталған институт қоғамдық тыңдалым ұйымдастырып, эскиздік жобаларын ұсынды.
Айдар ҚАЛИЕВ
