Көксу ауданына қарасты Кеңарал ауылы табиғи газға қосылды. Жергілікті халық осындай тарихи сәттің куәсі болды.
Салтанатты шараға барып, тұрғындарды қуанышымен құттықтаған аудан әкімі Дәулет Хәлелов:
– Кеңарал биыл газға қосылған 9-шы ауыл. Жыл соңына дейін 14 елді мекен көгілдір отынға қол жеткізеді. Аудан табиғи газға қосу мәселесі бойынша кестеден қалмай тұр, – дей келе жиналған көпшілікке ақжарма ниетін білдірді.
Өз кезегінде облыстық энергетика және тұрғын үй-коммуналдық шаруашылығы басқармасы басшысының орынбасары Азамат Бейісбаев: «Қарапайым халыққа ең алдымен жылу, таза су керек. Осыған орай өңірге газ тартылды. Мемлекет басшысының тапсырмасына сәйкес 2025 жылға дейін 126 елді мекен газбен қамтылады. Қазір Талдықорған – Үшарал бағытындағы магистральды газ құрылысы басталды», – деп облыста атқарылып жатқан жұмыстарды баяндады.
Жиын барысында ақжаулықты әжелер ауылға келген газды жағып, шашу шашты. Ауылдың құрметті ақсақалдары батасын беріп, жылы лебізін білдірді.
Үйіне алғашқылардың бірі болып көгілдір отын қосқан Фарида Жамалқан:
– Ауылымызда үлкен қуаныш болып жатыр. Біз заманауи ауылдың қатарына кірдік. Көгілдір отынға қосылған тұрғындардың көңілі шат. Енді баяғыдай күл шығармаймыз. Бұрын көмір тасып, ағаш кесетінбіз, – деп көмек қолын созып көгілдір отынды үйіне кіргізіп берген облыс, аудан басшылығына алғыс жаудырды.
Айта кетейік, облыс бойынша 51 аймақ көгілдір отынмен қамтылған. Жыл соңына дейін тағы 12 ауыл табиғи газға қосылмақ.
А. НАЗАРҰЛЫ
