Кербұлақ ауданында аймақ басшысы Бейбіт Исабаевтың төрағалығымен актив жиыны өтіп, жаңа сайланған аудан әкімі таныстырылды.
Алдымен Кербұлақ аудандық сайлау комиссиясының төрайымы Күләйза Шақарова сайлау қорытындысын жариялап, Жанат Жүнісбековке әкім куәлігін табыстады.
Жиында Бейбіт Өксікбайұлы:
– Жанат Төлегенұлы осы ауданның тумасы. Әр жылдары Жетісу, Алматы облыстарында түрлі жауапты қызметтер атқарған. 2022 жылғы желтоқсан айынан осы уақытқа дейін Кербұлақ ауданы әкімінің орынбасары лауазымында болды.Тәжірибесі, ұйымдастырушылық қабілеті бар. Енді өзі туып-өскен Кербұлақ ауданының әрі қарай дамуына бар күш-жігерін жұмсайды деп сенемін. Ал сіздер жаңа аудан әкіміне қолдау көрсетіп, бірге қоян-қолтық жұмыс істейсіздер деп ойлаймын, – дей келе жаңа әкімнің жұмысына сәттілік тілеп, нақты міндеттер жүктеді.
Атап айтсақ, аудан басшысына әуелі жылыту маусымының қалыпты жағдайда өтуін және көктемгі су тасқынына дайындық жұмыстарын жүйелі жүргізуді тапсырды. Сарыөзек ауылын абаттандыру, жоғары қысыммен бүкіл су құбыры жүйесін сынақтан өткізіп, ауызсудың сапасын тексеру жұмыстарын биылғы 1-ші шілдеге дейін толықтай аяқтап, пайдалануға беру қажеттігін, 6 елді мекенге газ тартудың құжаттарын әзірлеуді жүктеді. Сондай-ақ, көктемгі дала жұмыстарына дайындықты күшейтіп, ауыл шаруашылығы техникасының, қажетті тұқым қорының, тыңайтқыштың, арзандатылған дизель отынының дайындығы жоспарлы түрде жүргізілуді, игерілмей жатқан ауыл шаруашылық жерлерін мемлекет меншігіне қайтарып, қайта айналымға қосуды тапсырды. Облыс басшысы туризмді дамыту, жол жөндеу, «Көксай мыс қорыту комбинаты» жобасының іске асырылу барысында қажетті шараларды уақытында қабылдап, жүйелі жұмыс жүргізу керектігін айтты. Сонымен қатар, Бейбіт Өксікбайұлы былтыр ауданда атқарылған жұмыстар мен алдағы жоспарды кеңінен баяндады. Атап айтсақ, Сарыөзек – Көктал республикалық маңызы бар автомобиль жолын жөндеу жұмыстары былтыр толық аяқталып, «Сарыөзек ауылын айналып өту» жолы биыл пайдалануға беріледі. Осы жолдар бұзылмас үшін «Алацем» зауыты техникалық жол салды. Сарыөзекті ауызсумен толық қамтамасыз ету жобасы да аяқталуға жақын. Биылға абаттандыру жұмыстары ғана қалыпты. Сарыөзек ауылында төрт 60 пәтерлі көпқабатты тұрғын үй бой көтерген. 2024-2025-ші жылдары ауданның 16 елді мекенінде әлеуметтік жағынан аз қамтылған отбасыларға 288 жалға берілетін тұрғын үй сатып алынған. «Алацем» серіктестігінің демеушілігімен 2023 жылы Сарыөзекте орталық саябақ ашылған. Үш жылда жергілікті бюджет қаражатынан 17 әлеуметтік нысан қолданысқа берілген. Көксай ауылында 60 орынды орта мектептің және Сарыөзек ауылында кітапхананың құрылысы жүргізілуде. Бұған қоса «Ауылдағы денсаулық сақтауды жаңғырту» ұлттық жобасы аясында ауданда 17 нысан салынған. Қай саланы алып қарасақ та қарыштап дамып келеді. Облыс басшысы бұл жұмыстар алдағы уақытта да жалғасын табатындығын айтты.
Тұрған МАЙШЫБЕКОВА,
аудан тұрғыны:
– Қарапайым халыққа ең алдымен жылу, таза су керек. Осыған орай өңірге газ тартылды. Бұрын біз көмір тасып, күл шығарып, ағаш кесетінбіз. Бір қыста бірнеше тонна көмір жағамыз. Ал қатты отынның бағасы жылда қымбаттайды. Қазір шүкір, ауызсу тартылып, газ келіп, жол жөнделді. Сондықтан, халық қамы үшін игі шара атқарып жатқан жандарға ризашылығымызды білдіреміз.
Хасира ҚУАНДЫҚОВА,
аудан тұрғыны:
– Сарыөзекте тұрғаныма 30 жылдан асты. Ауылымыз жылдан жылға гүлденіп, тотыдай түрленіп келеді. Жаңадан аурухана салынды. Қазір облысқа сабылмай-ақ, барлық ем-домды жаңа емханадан аламыз. Білікті мамандар да, заман талабына сай аппараттар да бар.
Айдар ҚАЛИЕВ
