Елбасы Жолдауында 2019 жылдан бастап жалақы мөлшерін өсіру туралы баса айтып өткен болатын. Бұл іс бүгінде әр өңірде әр қилы жүргізіліп жатыр. Облыс әкімінің бірінші орынбасары Лаззат ТҰРЛАШОВ осы мәселеге байланысты арнайы селекторлық жиын өткізді.
Бірінші болып баяндама жасаған облыстық еңбек инспекциясы бойынша басқармасы – бас мемлекеттік еңбек инспекторы Керімбек Жаншабайдың сөзінше облыстағы ең аз жалақы мөлшері – 43 503 теңге. Дәл осы сомаға бүгінде 79 374 қызметкер жұмыс істеп жүр. Бұл мемлекеттік орындарды есепке алмағандағы статистика. Ал дәл осы жандардың жалақысын өсіру мәселесі қазірде үлкен сұрақ болып тұр. Өңірде 54 ірі, 311 орта және 43138 кіші кәсіпорындар жұмыс істеп жатыр.
Әр елді мекенде еңбекке байланысты күнделікті мониторинг жүргізіліп тұрады. Дәл қазіргі сәтте Еңбекшіқазақ, Кербұлақ, Қарасай, Алакөл, Көксу, Іле, Сарқан, Қаратал аудандарымен Қапшағай қаласында жалақыны көтеру бойынша жұмыс баяу жүруде. Мониторинг нәтижесі бойынша 1812 кәсіпорын 12 926 жұмысшының еңбекақысын келесі жылдан бастап өсіреді. Ал бұл жұмысын дөңгелентіп отырған кәіспорындардың тек 4,2%-ын ғана құрайды.
– Бұл статистика жалақыны өсіру мәселесі бойынша арнайы құрылған топтың еңбегі. Ал дәл осындай мониторинг жүргізетін топ Қарасай, Райымбек аудандарымен Талдықорған, Текелі қалаларында әлі құрылған жоқ. Кәсіпорын басшыларымен арнайы кездесулер ұйымдастырылып, меморандумға қол қойылып жатыр, – деді Керімбек Жаншабайұлы. Сөз соңында әлі де аудандардың жұмысын үдетіп, статистиканы жақсарту керектігін қадап тұрып айтты.
Лаззат Махатұлы жалақыны өсіруге байланысты жан-жақты түсіндіру, ақпарат беру бойыша бұқаралық ақпарат құралдары да белсенді жұмыс жүргізу керектігін атап өтті. Облыстық кәсіпкерлік және индустриялық-инновациялық даму басқармасы басшысының орынбасары Гүлмира Баталова жыл басында өңірдің 22 стратегиялық кәсіпорындардың жалақысы 10%-ға өскен. Біз осы бағытта жұмыс жүргізе бермекпіз, – деп түйіндеді.
Алайда облыс әкімінің бірінші орынбасары осы мәселе төңірегіндегі жұмыстарға көңілі толмайтындығын айтты. Ол ірі бизестегі ең төменгі жалақы емес, жалпы алғанда халықтың табысы деп атап өтті. Қосымша аталған басқарма тікелей үлкен және кіші бизнес бойынша барлық сауалдарды шешуге тиіс.
– Кәсіпорындардың тізімін беріңдер және кімнің қалай жалақысы өсіп жатқанын көрейік. Бізге анық және нақты мониторинг қажет. Жұмыстың нәтижесі көрінбейінше тоқтатпауымыз керек. Кәсіпорындардың 4,2% қамтуын қалай түсінеміз? Бұл аудан әкімдерінің, сол салаға жауапты басшылық қызметкерлерінің дұрыс жұмыс істемейтіндігін көрсетеді, – деді Лаззат Махатұлы.
Одан кейін облыс әкімнің бірінші орынбасары аудан әкімдерінің осы мәселе бойынша баяндамаларына ден қойып, айтқандарын тыңдады. Елбасы бастамасымен жалақыны өсіру бойынша әр аудан әкімі мен қызметкерлерге тиісті тапсырмалар жүктеді. Баяндамашылар ертеңнен бастап аудандарда мониторинг жүргізілетінін және арнайы топ өкілдерімен кездесулер ұйымдастырылып, нақты жұмысқа кірісетіндіктерін айтты. Алайда кей аудандардағы мәселелер шешілмек түгілі, шешу жолын ойластырмағанда. Сонымен бірге зауыт қызметкерлері, кәсіпорындардың жұмысшылары қанша теңге алып, қалай жұмыс істеп жатқандықтары арнайы мониторингпен есептелмек.
Лаззат Тұрлашов аудан әкімдеріне «7-20-25» бағдарламасы бойынша дұрыс жұмыс істемей жатқанын да айтты. Үй алғысы келетіндердің саны көп, алайда банкпен бірлесіп атқарылатын жұмыс нашарлығынан нәтиженің де оңбай тұрғандығын сөз етті.
Жиын соңында облыс әкімінің бірінші орынбасары нақты тапсырмалар жүктеп, нәтижесін көп кешіктірмей шығаруларын тапсырды.
Серік ҚАНТАЙ,
“Жетісу”
