Оқушылар сарайында Халықаралық жастар күніне орай «Тәуелсіз жастар алаңы» атты республикалық пікірсайыс турнирі өтті. «Қоғамдық даму басқармасы» ММ және «Жетісу Жастары» КММ ұйымдастырған сайысқа еліміздің әр өңірінен 20 команда қатысты.
Жарыстың ашылу салтанатында сөз алған облыстық қоғамдық даму басқармасы басшысының орынбасары Ілияс Түстікбаев: «Облысымызда пікірсайыспен айналысып, жоғары жетістікке жеткен азаматтар аз емес. Оның бірі – Болат Керімбек. Қазіргі таңда мәжіліс депутаты. Жетісу облысы пікірсайысының жарқын бір түлегі деп айтсақ болады», – деп пікірсайыстың маңыздылығына тоқталып, қатысушыларға сәттілік тіледі.
Пікірсайыс турниріне 50-ге жуық жас келді. Америкалық формат түрінде өткен сөз сайысында жастар қоғамда белең алған лудомания, нашақорлық, жемқорлық, алаяқтық сынды дерттен арылудың жолдарын қарастырды. Қоғамдағы өзекті мәселелерден бөлек, мәдениет, өнер, білім салалары да назардан тыс қалған жоқ.
Жарыс қорытындысы бойынша 1-орынды Алматы облысы «Ескелді би» командасы жеңіп, 500 000 теңгені олжалады. 2-орынды және 300 000 теңгені Астана қаласының «Адамгершілік» командасы еншіледі. Тұғырдың үшінші сатысынан көрінген алматылық «Мастер класс» командасына 150 000 теңгенің сертификаты бұйырды. Турнирде Шыңғар Қазырхан «Үздік спикер», Еркежан Ардашқызы «Үздік төреші» номинациясын жеңіп алды. Оларға 100 мың теңге ақшалай қаржы берілді.
Айдар ҚАЛИЕВ
