Әлеуметтік желілерде тараған мемлекеттік туды өртеп, елтаңбаны талқандаған бейнежазбаның қай жерде және қандай мақсатта түсірілгені белгілі болды, – деп хабарлайды 7-su.kz ақпараттық порталы kznews.kz сайтына сілтеме жасап.
Желі қолданушыларының наразылығын тудырған бұл бейнежазба Павлодар қаласындағы М. Жүсіп атындағы мектепте түсірілгені анықталды. Оқиғаның мән-жайына қатысты қалалық білім бөлімі ресми түсініктеме берді.
Орын алған жағдайға байланысты Павлодар қалалық білім бөлімі арнайы хабарлама таратып, іс-шараның заңдылығы мен жіберілген кемшіліктерге тоқталды:
«5 ақпанда Павлодардағы М. Жүсіп атындағы мектепте заңға сай, мектеп комиссиясы тарапынан ұлттық стандарт пен техникалық талаптарға сәйкес келмейтін заттарды жою жұмыстары жүргізілген. Аталған іс-әрекеттердің бейнетіркеуі тек қызметтік мақсатта жүргізілген және таратуға арналмаған. Іс-шараларды ұйымдастыру мен өткізу тәртібіне тиісті деңгейде бақылау жасалмауына байланысты мектеп басшысына қатаң сөгіс түріндегі тәртіптік жаза қолданылды», – деп мәлімдеді ведомство өкілдері.
Қазақстан заңнамасына сәйкес, тозған немесе стандартқа сай келмейтін мемлекеттік рәміздерді пайдаланудан шығарудың нақты механизмі бар. Оларды қоқысқа тастауға тыйым салынады. Керісінше, комиссия мүшелерінің қатысуымен рәміздердің қалдықтары танылмайтындай етіп (өртеу, ұсақтау, балқыту арқылы) жойылуы тиіс.
Алайда, аталмыш процесс – өте жабық әрі этикалық тұрғыдан нәзік мәселе. Павлодардағы жағдай техникалық тұрғыдан заңға сәйкес келгенімен, оның бейнетаспаға түсірілуі және жариялануы қоғамда «рәміздерді қорлау» ретінде қабылданды. Мектеп басшылығының іс-шараны өткізу кезіндегі бақылауды босаңсытып алуы мемлекеттік маңызы бар рәміздердің қасиетіне нұқсан келтіргендей әсер қалдырды.
