Мүмкіндігі шектеулі жандарға үміт сыйлаған, жанға шипа дертке дауа болған Талдықорғандағы «Асар» спорттық-оңалту орталығына 10 жыл. Осыған орай аталмыш орталықта мерекелік шара өтті. Оған Жапонияның Қазақстандағы Төтенше және Өкілетті Елшісі Джун ЯМАДА қатысты.
Жиын барысында облыстық мәслихат төрағасы Гүлнар Тойлыбаева:
– Оңалту орталығының мерейтойына арнайы іссапармен келген Джун Ямада мырзаға ерекше алғысымызды білдіреміз. Жапонияның Қазақстандағы Төтенше және Өкілетті Елшісі орталыққа құрал-жабдықтар алуға көп көмектесті. «Асар» әлеуметтік орталығы бүгінгі күнге дейін ерекше қажеттіліктері бар жандарға талапқа сай сапалы қызмет көрсетіп, талай жанның аяғынан тұрып кетуіне көмектесті. Орталықтың арқасында мүгедектігі бар азаматтардың өмір сүру сапасы артып келеді. Орталығымыз жандана берсін, – деп ізгі тілегін білдірді.
Осыдан кейін Джун Ямада: «Бұл біз қолдаған Қазақстандағы ең ірі жобалардың бірі. Орталыққа шетелдерден заманауи құрал-жабдықтар алынды. Ол нәтижесін берді. Мұнда емделіп, аяғынан тік тұрып кеткен жандар бар дегенді естіп қуанып отырмын. Орталықтың жұмысы әлі де жанданатынына сенімдімін», – деп ақжарма тілегін ақтарды.
Өз кезегінде сөз алған «Асар» спорттық-оңалту орталығының директоры Елдос Баялышбаев ірі жобаның алғашқы қадамын жасауға көмектескен ата-анасына, мүмкіндігі шектеулі жандарды емдеп, жұмысын абыроймен атқарып жүрген білікті дәрігерлерге, заман талабына сай түрлі аппараттар алуға мұрындық болған Жапония Елшілігіне алғысын білдіріп, алдағы уақытта да барын салып жұмыс істейтінін жеткізді.
Шараға жиылған жұртшылық кезек-кезегімен сөз алып, ізгі тілектерін білдірді. Сондай-ақ, Елдос Баялышбаевқа Еңбек және халықты әлеуметтік қорғау минис-трінің құттықтау жеделхаты оқылды. Онда Елдостың әлеуметтік қорғау ісіне қосқан үлесі аталып, орталық басшысы мен ұжымының атына ақ тілектер жолдаған.
Осыдан кейін қонақтар оңалту орта-лығының ішін аралады. Орталықта негізінен омыртқаның түрлі жарақаттарынан, инсульттан, балалардың церебральді салдығы, І-ІІІ топтағы мүгедектіктен кейін оңалту жүргізіледі. 2015 жылдан бастап осы жобаны іске асыра бастаған Елдос «Сәби» қорының «Өз бизнесіңді құр» конкурсында жеңімпаз атаныпты. Сонымен қатар, әр жылдары Жапония Елшілігінің жабдық сатып алуға берілетін «Шөп тамырлары» грантын екі рет жеңіп алып, Испания, АҚШ, Германия, Қытай, Италия, Ресей, Польша елдерінен заманауи аппараттар алынған.
Жаңа нысанның құрылысы 2018 жылы басталып, 2023 жылы аяқталды. Мұнда физиотерапия, кинезотерапия, массаж, емдеу, психолог және логопед кабинеттері жабдықталған. Бір жыл ішінде оңалту орталығында 4000-нан астам адам емделген. Оның 400-і балдаққа тұрып кеткен. Бұл – жанға шипа болған оңалту орталығы үшін үлкен жетістік.
Айдар ҚАЛИЕВ
