2024 жылғы 1 маусымдағы жағдай бойынша отандастарымыздың БЖЗҚ-дағы зейнетақы шоттарындағы зейнетақы активтері 19,2 трлн. теңгеден асты. Жыл басынан бері 5 ай ішінде 1,4 трлн. теңгеге өсті. Зейнетақы жинақтарының жылдық өсімі 3,4 трлн. теңгеден асты.
Жалпы, зейнетақы қоржынында міндетті зейнетақы жарналары есебінен қалыптастырылған жинақ 96%-дан асады. Оның көлемі бір жылда 21%-ға ұлғайып, 2024 жылғы 1 маусымға шамамен 18,6 трлн. теңге болды. Міндетті кәсіптік зейнетақы жарналары есебінен зейнетақы жинақтары 601,7 млрд. теңгеден асты. 2023 жылғы 1 маусыммен салыстырғанда көрсеткіш 45,6%-ға ұлғайған. Ерікті зейнетақы жарналары бойынша шоттарда шамамен 6,2 млрд. теңге жинақталды.
2024 жылғы 1 қаңтардан бастап салымшылардың зейнетақы шоттарына қосымша қаражат – жұмыс берушінің міндетті зейнетақы жарналары түсуде. 2024 жылдың 5 айында ЖМЗЖ есебінен зейнетақы жинақтарының сомасы 77,5 млрд. теңгеден асты.
Зейнетақы жинақтарының көлемі зей-нетақы жарналары мен инвестициялық табыс түріндегі кіріс ағындары есебінен ұлғаяды. 2024 жылғы қаңтар-мамырда салымшылардың шоттарына түскен зейнетақы жарналары 1 трлн. теңгеден асты (өсім өткен жылғы көрсеткішпен салыстырғанда 29,2% немесе 244 млрд. теңгеге артық).
Жарналардың барлық түрлері оң сипатты көрсетті: МЗЖ есепке алынатын жеке зейнетақы шоттарына жыл басынан бері 954,7 млрд. теңгеден астам. МЗЖ есепке алынатын ЖЗШ-ға шамамен 47,3 млрд. теңге. ЕЗЖ – 1,2 млрд. теңге (өсім 34,1%) түсті.
БЖЗҚ салымшыларының жеке және шартты зейнетақы шоттарына есептелген таза инвестициялық кіріс жыл басынан бері 01.06.2024 ж. шамамен 631,4 млрд. теңге. Бұл сома өткен жылмен салыстырғанда шамамен 138 млрд. теңгеге артық.
«БЖЗҚ» АҚ баспасөз орталығы
Фото: gov.kz
