Минск қаласында өткен ТМД-ға қатысушы мемлекеттердің мұғалімдері мен білім беру қызметкерлерінің IX съезінде отандық мамандар жоғары нәтиже көрсетті, – деп хабарлайды 7-su.kz ақпараттық порталы.
Халықаралық ауқымды жиында Қазақстан делегациясының үш мүшесі «ТМД білім беру ісінің үздігі» төсбелгісімен марапатталды. Олардың қатарында Ы. Алтынсарин атындағы Ұлттық білім академиясының бас ғылыми қызметкері Жаубай Қараев, Абай атындағы Қазақ ұлттық педагогикалық университетінің академиялық қызмет жөніндегі проректоры Бану Нарбекова және Шымкент қаласындағы А.С. Пушкин атындағы №1 мектеп-гимназияның биология пәні мұғалімі Алина Соловьёва бар. Отандық білім беру өкілдерінің бұл жетістігі елдегі педагогикалық мектептің жоғары деңгейін айқын айғақтайды.
Сонымен қатар, қазақстандық педагогтер IV Халықаралық педагогикалық шеберлік фестивалінде екі бірінші және бір екінші орынды жеңіп алды. Беларусьтің Ұлттық білім академиясында ұйымдастырылған фестивальдің бетпе-бет кезеңінде қатысушылар шеберлік сабақтарын өткізіп, бірегей тәжірибелерімен бөлісті. Сайыс қорытындысы бойынша Ұлытау облысы Жаңаарқа ауданындағы №1 мектеп-лицейінің педагогі Бауыржан Базарбаев бірінші орынды иеленіп, І дәрежелі дипломмен марапатталды. «Тәрбиеші» номинациясы бойынша Ақтөбе облысының өкілі Индира Назарова топ жарса, «Психолог / әлеуметтік педагог» номинациясында Павлодар облысынан барған Римма Абигузина екінші орынға табан тіреді.
Жеті мемлекеттің өкілдері бас қосқан съезде білім беру саласындағы ынтымақтастықты дамыту, мұғалімдердің кәсіби ұтқырлығын арттыру, инновацияларды енгізу және тиімді тәжірибелерді тарату мәселелері кеңінен талқыланды. Халықаралық деңгейдегі мұндай жеңістер Жетісу өңірі сияқты аймақтардағы мектептер мен жас мамандарға үлкен серпін береді. Алдыңғы қатарлы әдістемелерді ауылдық және қалалық білім беру ошақтарына енгізу білім сапасын теңестіруге жол ашады. Педагог мәртебесінің өсуі мен заманауи дағдыларды меңгеру сапалы ұрпақ тәрбиелеудің негізгі діңгегі.
