2025 жылғы 1 қазандағы жағдай бойынша, Мемлекеттік әлеуметтік сақтандыру қорынан (МӘСҚ) жұмысынан айырылуына байланысты әлеуметтік төлем алушылардың саны 285,2 мың адамды құрады, деп хабарлайды 7-su.kz ақпарттық порталы kaz.inform.kz сайтына сілтеме жасап.
Олардың ішінде 240,5 мың адамға төлем биыл алғаш рет тағайындалған.
Еңбек және халықты әлеуметтік қорғау министрлігінің мәліметінше, жұмыссыз қалған азаматтарға төленген жалпы сома 95 млрд теңгеден асты.
Қолданыстағы заңнамаға сәйкес, жұмыстан босатылған азаматтар міндетті әлеуметтік сақтандыру жүйесіне қатысу өтіліне және соңғы 24 айдағы орташа табысына байланысты 1 айдан 6 айға дейін әлеуметтік төлем ала алады.
Төлем мөлшері жоғалған кірістің 45%-ына дейінгі көлемде есептеледі және МӘСҚ қаражаты есебінен жүзеге асырылады.
Жұмыстан айырылған азаматтарға әлеуметтік төлем алу үшін келесі қадамдарды орындау қажет:
-
eGov.kz порталында авторизациялану;
-
«Жұмысқа орналастыру және жұмыспен қамту» бөлімінен «Жұмыс іздеуші адамдарды тіркеу» қызметін таңдау;
-
Онлайн өтінімге қажетті деректерді енгізіп, ЭЦҚ-мен қол қою;
-
Бір күн ішінде тұрғылықты жердегі мансап орталығы бос жұмыс орындарын ұсынады;
-
Егер жұмыс табылмаса, 3 жұмыс күні ішінде азаматқа жұмыссыз мәртебесі беріледі.
Бұл қызметті Электрондық еңбек биржасы (enbek.kz) платформасы арқылы да онлайн алуға болады.
Жұмыссыз ретінде тіркелген азаматтарға Еңбек және халықты әлеуметтік қорғау министрлігінің ақпараттық жүйесі МӘСҚ-тан төлем тағайындау туралы SMS-хабарлама жібереді.
Азамат SMS арқылы келісімін бергеннен кейін, төлем автоматты түрде тағайындалады.
МӘСҚ қаражаты есебінен жұмыстан айырылған жағдайда төленетін әлеуметтік төлем жұмыстан шығу себебіне қарамастан жүзеге асырылады және жұмыссыз қалған азаматты жұмыс іздеу кезеңінде қолдауға арналған.
