Назарбаев Зияткерлік мектебіне конкурстық іріктеу, білім беру процесі, оқытудың артықшылықтары туралы Талдықорған қаласындағы Зияткерлік мектебі директорының орынбасары Қайсар Нұрбек Өңірлік коммуникация қызметінің брифингінде айтып берді.
8 қаңтардан Назарбаев Зияткерлік мектебінде 6-сынып оқушылары үшін құжаттар қабылдау басталды. «Өркен» білім беру грантын беру үшін өтінімдер 2025 жылғы 11 ақпанға дейін қабылданады.
Естеріңізге салайық, кешенді тестілеу 27-28 наурыз аралығында өтеді. Бірінші күні жаратылыстану-математика бағыттағы пәндерді оқу қабілеттерін бағалау бойынша тест өткізіледі. Бұл «Математика», «Сандық сипаттамалар» және «Жаратылыстану». Екінші күн қазақ, орыс және ағылшын тілдерін білуге бағытталған. Тестілеуге 120 минут бөлінеді. Нәтижелер www.nis.edu.kz сайтында жарияланады.
Назарбаев Зияткерлік мектептерінде оқу процесі «Назарбаев Зияткерлік мектептері» ДББҰ — NIS-Programme білім беру бағдарламасы бойынша жүзеге асырылады.
Білім беру бағдарламасы 2012 жылы үздік ұлттық және халықаралық тәжірибені интеграциялау негізінде стратегиялық әріптес Кембридж Университетінің Халықаралық емтихан кеңесімен бірлесіп әзірленді.
NIS-Programme оқушылардың бойында іргелі академиялық білімді қалыптастыруға, жаратылыстану-математикалық пәндерді тереңдетіп оқыту арқылы сыни ойлау мен функционалдық сауаттылықты дамытуға, жоғары деңгейде ақпараттық-коммуникациялық технологияларды пайдалануға және үштілді білім беруге бағытталған.
Бүгінгі таңда NIS-Programme A/As-level (Ұлыбритания), O-Level (Сингапур), Халықаралық бакалавриат және т.б. көптеген халықаралық бағдарламалармен салыстыруға келетін қазақстандық бренд болып табылады. Зияткерлік мектептердің 12 сынып түлегі сертификатын халықаралық ұйымдар мен білім туралы куәліктерді тану жүйелері және бакалавриат бағдарламаларына тікелей түсу үшін жетекші шетелдік университеттер таниды.
2010 жылдан бастап Талдықорғандық Зияткерлік мектебін 948 түлек бітірді. Оның 183-і Назарбаев Университетіне, 151-і АҚШ, Ресей, Германия, Түркия, Оңтүстік Корея, Венгрия, Чехия, Қытайдың шетелдік жоғары оқу орындарына түсті.
Конкурстық іріктеу бойынша құжаттар тізімін, тапсырмалар үлгілерін және басқа да толық ақпаратты www.nis.edu.kz сайтынан алуға болады. Құжаттарды қабылдау Талдықорған қаласы, Қаратал ш / а, 47 мекенжайы бойынша жүргізіледі.
«Жетісу-Ақпарат»
