Көксу ауданы аграрлы аймақ болғандықтан биыл ауылшаруашылығы дақылдары 31,4 мың гектарға себілген. Қазір жүгері мен қант қызылшасынан басқа барлық дақылдың жинау науқаны аяқталған. Бұл туралы аудан әкімі Дәулет Халелов тілшілермен болған баспасөз мәслихатында айтты.
Аудан бойынша 178 шаруа қожалығы 2337 гектар қант қызылшасын сепкен. 143 шаруа өнімді жинау жұмысымен айналысуда. Бүгінде аудан бойынша 2186 гектар жиналып, 117,5 мың тонна өнім алынған. Көксу қант зауыты бүгінге дейін 210,7 мың тонна өнім қабылдаған.
– Шаруалардың ала жаздайғы еңбегі далада қалмайды. Қант зауыты штаттық режимде өнім қабылдап жатыр. Тәтті түбірді өткізу жұмысын тікелей қадағалап отырмыз. Шаруалар үшін алаңдауға негіз жоқ. Жоспар бойынша 2589 гектарға күздік дақыл себу жұмыстары басталды. 8000 гектардың 7200 гектарына сүдігер көтерілді. Ауылшаруашылық саласының жұмысы жүйелі атқарылуда. Жалпы, ауданда 1 ірі, 2 орта кәсіпорын тұрақты жұмыс істейді. Көксу қант зауыты биыл 11,8 млрд. теңгеге 37,1 мың тонна қант өндірсе, майбұршақ өңдейтін «Уызмай- индастри» зауыты 10,7 млрд. теңгеге 37,9 мың тонна өнім шығарды. «Строитель» ЖШС 1,1 млрд. теңгеге 40,6 мың тонна құрылыс материалдарын өндірді. Бұл өндірістер аудан халқын жұмыспен тұрақты қамтуға көмектесіп келеді,– дейді аудан басшысы.
Қазір Көксу ауданында құрылыс қарқынды. Дәулет Кенжеханұлының айтуынша, 60 пәтерлік тұрғын үйдің құрылысы басталып, қыркүйек айында екінші 60 пәтерлік тұрғын үйдің құрылысына қаражат бөлінген. Енді аудан халқы жайлы баспанаға ие болатын күн де алыс емес. Қазіргі таңда Балпық би ауылында жоспарланған 30 үйдің 13-і, Жарлыөзек ауылында жоспарланған 10 үйдің төртеуі аяқталып, Мұқыры ауылында 10 үйдің құрылысы жүргізілуде.
Аудан бойынша 34 елді мекеннің 13-і газдандырылған. Көгілдір отынға 27,9 мың адам қол жеткізді.
«Ауыл – ел бесігі» жобасы бойынша Жарлыөзек, Мұқыры, Мұсабек, Айнабұлақ, Көкбастау ауылдарының көшелеріне жарық шамдары орнатылды. Нәтижесінде аудан бойынша 603 көшенің жарық шамдары іске қосылды. Жоба бойынша үнемделген қаражат есебінен Мұқаншы ауылдық округінің елді мекендерінің жолдарына орташа жөндеу жүргізілуде.
Е. БАУЫРЖАНҚЫЗЫ
