Экономикалық көрсеткіштің көңіл тоғайтар тұсы да, халықтың жарқын өмірінің кепілі де жол-көлік логистикасының сапасына тікелей байланысты. Бұл орайда еліміздегі жол құрылысы жақсы аймақтың қатарында Жетісу облысын айтуға болады. Халықаралық, республикалық, облыстық маңызы бар жолдары жыл өткен сайын жаңарып, жақсарып келеді. Күні кеше жазиралы Жаркент жеріне барған сапарымызда бұған тағы бір мәрте көз жеткіздік.
Тіршіліктің күретамыры саналатын жол тұрғындарға қолайлы орта қалыптастыратыны анық. Бұл өз кезегінде шаһарға туристердің ағылып келуіне де айрықша ықпал етеді. Бүгінде облысымызда жол жөндеу жұмыстары қарқын алуда. Сарыөзек – Көктал және Жетісу облысы бойынша Алматы – Көкпек – Көктал – Қорғас – Сарыөзек республикалық маңызы бар автомобиль жолдары (185 км.) және Алматы – Көкпек – Көктал – Қорғас (63 км.) аралығындағы жолды орташа жөндеу жұмыстары жүруде. Қазіргі таңда «ҚазАвтоЖол» ҰҚ» АҚ ұйымдастыруымен, «Нұрлы Жол» ЖШС мердігерлігімен аталмыш аймақта асфальт төселіп, қарқынды жұмыс жүруде.
Аталған республикалық маңызы бар жол құрылысына жауапты мердігер компанияның жоба жетекшісі Бақытбек Тоқтарбайдың айтуы бойынша, жөндеу жұмыстарына 56 жұмысшы және 45 бірлік арнайы техника жұмылдырылған.
– Жол ірі және ұсақ түйірлі 2 қабатты асфальтпен жабылады. Сондай-ақ, автожолдың жол белгілері ауыстырылып, қоршаулар салынады. Жоспар бойынша орташа жөндеу жұмыстарын қазан айына дейін аяқтаймыз деп отырмыз. Елімізде Қорғасқа қатынайтын көліктің көптігінен автожолдан жолаушылар үзілмейді. Әрі айналмалы жолдың жоқтығы жөндеу жұмыстарына аздап кедергілер келтіретіні де рас. Алайда, жұмыс барысын барынша тоқтатпауға тырысып жүрміз. Қазіргі таңда 32 шақырымның 16 шақырымына асфальтбетонның төменгі қабаты, 10 шақырымына жоғарғы қабаты төселінді, – дейді жоба жетекшісі.
Бұл іске жергілікті тұрғындар да дән риза.
Жалпы, бекітілген кестеге сәйкес алдағы уақытта жол жөндеу жұмыстары кезең-кезеңімен аяқталатын болады.
Өңірімізде Кербұлақ және Панфилов аудандары арқылы өтетін 248 шақырым республикалық маңызы бар автожол бар. Қазіргі таңда соның 81 шақырымы жақсы болса, қалған 167 шақырымы қанағаттанарлық жағдайда. Қазіргі таңда Мемлекет басшысының тапсырмасына сәйкес екі аудан арқылы өтетін республикалық маңызы бар жолдарды нормативтік қалыпқа келтіру бойынша орташа жөндеу жұмыстары жүргізілуде. Тапсырмаға сәйкес 2023 жылы 81 шақырымы жөнделді. Атап айтсақ, Алтынемел асуы арқылы өтетін 23, Алтынемел асуынан Қоңырөлең елді мекеніне дейінгі 42 шақырым күрделі жөндеуден өтті. Алдағы жылы Сарыөзектен Алтынемел асуына дейінгі 45 шақырымды жөндеуге мердігер компания анықталғаннан кейін арнайы техника мен жұмысшылар жұмылдырылады. Бұл ретте Қоңырөлеңнен Көктал елді мекеніне дейін 67 шақырым жол учаскесі бар. Орташа жөндеу жұмыстары аясында екі қабатты асфальтбетон жабылып төсеу жоспарланған. Сонымен қатар, жол жиегін тегістей отырып, елді мекендер арқылы өтетін республикалық маңызы бар жолдарға тротуарлар жасалып, жарықтандыру жүйесі жүргізілмек.
Бүгінде Панфилов ауданы арқылы Айдарлы елді мекенінен Көкталға дейінгі 15 шақырымды құрайтын республикалық жолды жөндеу үшін жоба бойынша конкурстық рәсімдер жүргізілуде. Алдағы 1 апта көлемінде мердігер анықталысымен жол жөндеу жұмысын бастап, жыл соңына дейін аяқтау жоспарланып отыр.
– Жетісу облысында жол құрылысының ауқымы артып келеді. Бұл инфрақұрылымдық жұмыстар өңірдің транзиттік-логистикалық әлеуетін одан әрі дамытуға жаңа серпін береді. Мемлекет басшысының тапсырмасына сәйкес жасалған іс-шаралар жоспарына орай биыл және келесі жылы 167 шақырым болатын Сарыөзек – Көктал және Алматы – Көкпек – Көктал – Қорғас автожолдарында жалпы сомасы 18 млрд. теңгеге жөндеу жұмыстары жүргізіледі. Жақын арада Сарыөзек пен Көктал, сондай-ақ, Айдарлы мен Көктал елді мекендері арасындағы жолдың бірнеше учаскелерінде күрделі және орташа жөндеуді жалғастыру жоспарланып отыр. Тағы бір жобада автожолдың еңіс бөлігін қалпына келтіру мен Көнбе өзені арқылы көпір салу көзделген, – дейді «ҚазАвтоЖол» ҰК» АҚ Жетісу облыстық филиалы директорының орынбасары Жасұлан Қалтаев.
Айғаным АЙТМҰХАН
