Сенат депутаттарының сапары Қапшағай қаласында өз жалғасын тапты. Бірғаным Әйтімова жиналған жұртшылықты еліміздің Ата Заңының қабылданған күнімен, жаңа оқу жылының басталуымен және биыл осы айтулы мерекелермен тұспа-тұс келіп отырған мұсылман қауымының ең ұлық мейрамы болып табылатын Құрбан айтпен шын жүректен құттықтады.
Парламент қабырғасында қабылданып, күшіне енген заңдарды жан-жақты таныстырған Бірғаным Сарықызы Мемлекет басшысының саясатын жүзеге асыру бағытында жасалып жатқан негізгі істерге толығырақ тоқталып, міндетті әлеуметтік медициналық сақтандыру жүйесі жайын әңгімесінің арқауына айналдырды.
Халық қалаулыларымен болған кездесуде Қапшағай қаласы әкімінің орынбасары Сағдат Нұрғазиев, қалалық ішкі саясат бөлімінің басшысы Нұрлан Аққойшы, қалалық дене шынықтыру және спорт бөлімінің басшысы Наталья Носова мен қалалық мәслихат хатшысы Қайрат Ахметтаевтың жолбасшылығымен қайта жаңғыртылған Орталық саябақ аллеясы мен жуырда пайдалануға берілген ашық аспан астындағы футбол, баскетбол, волейбол, роллер, үлкен теннис, бокс-тренинг алаңдары мен спортшыларға жасалған жағдайды көрген Сенат депутаттары Бірғаным Әйтімова мен Нұрлан Қылышбаев халық игілігі жолында атқарылып жатқан жұмысқа сәттілік тіледі. Қала әкімі Талғат Қайнарбековтың бастамасымен алдағы уақытта Спорт сарайының бой көтермекші екендігін мақтанышпен жеткізген қалалық дене шынықтыру және спорт бөлімінің басшысы Наталья Носова меймандарға болашақта қолға алынатын қыруар шаруа жайында кеңірек әңгімеледі.
Жұмыс сапары өндірістік аймақ саналатын Заречный ауылында өз жалғасын тауып, осы елді мекенде қоныс тепкен «Кнауф Гипс Қапшағай» мекемесінің тыныс-тіршілігімен танысты. Технологияның соңғы үлгісіндегі құрал-жабдықтармен толықтай жабдықталған зауыт цехтарын аралаған сенаторлар мұнда өндіріліп жатқан қазіргі таңда зор сұранысқа ие құрылыс материалдарын көріп, өз бағаларын берді.
***
ҚР Парламенті Сенатының депутаты Бірғаным Әйтімова Талғар ауданы, Панфилов ауылдық округіне қарасты «Байсерке-Агро» ЖШС жұмыстарымен танысып, ұжым басшыларымен және еңбек адамдарымен кездесті. Кездесуде сенатор Елбасы Н. Назарбаев алға қойып отырған «Ұлт жоспарын» көпшілікке түсіндірді.
Аталған шаруашылықтың ерекшелігі – аграрлық саладағы жаңа технологияларды қолданысқа енгізіп, оны ойдағыдай игеруде. Қол жеткізген табыстары қомақты. Бәсекеге қабілетті. Қатарынан озып тұрған ұжым. Серіктестік 2002 жылы құрылды. Олар осы кезең ішінде тек ілгері басты. Тың ізденістерге ұмтылды. Астық алқабының көлемін ұлғайта отырып, дәнді дақылдың сапасын арттырды. Оның жаңа түрлерін өсіруді қолға алды. Асыл тұқымды сүтті сиырлардың санын көбейтті. Жылқылары да жаңа тұрпатта. Нәтижесінде шаруашылық өндірген астық, ет пен сүт әрқашан сұранысқа ие. Мұның сыртында төрт гектар жылыжай кешені бар. Италияндық құрал-жабдықтармен жұмыс істейтін сүт зауыты тұтынушылардың талғамын толық қамтамасыз ете алады.
– Ауылшаруашылығын дамыту барысында біз отандық ғалымдар әзірлеген инновациялық технологияларды басшылыққа аламыз. Ең бастысы – сапалы өнім өндіріп, халық көңілінен шыға білсек болғаны, – дейді серіктестік басшысы Темірхан Досмұхамбетов.
Шаруашылықтың екінші қырына көз салсақ, мұнда ғылыми өндірістік оқыту орталығы жұмыс істейді. Жоғары оқу орындарының және колледж студенттері орталыққа келіп іс-тәжірибелерге қатысады. Теорияны тәжірибемен ұштастырады. Жаңалықтар іздеуге бейімделеді.
Серіктестік аумағында қазақ өсімдік қорғау, карантин және малдәрігерлік ғылыми-зерттеу институты мен ветеринария институты бар. Олар бірлесе жұмыс істеп, көптеген жобаны қолға алып жатыр. Шетелде білім алған жастар туған жерге ту тігіп, осында шоғырлана бастаған. Солардың белсенді өкілі Данияр Жанбеков шаруашылықтың алдағы атқаратын жұмыстарымен таныстырды.
Отандық ғалымдар шетелдік асыл тұқымды сиырлардың тұқымын қайта өсіріп, өз топырағымызға жерсіндіріп жатқан жайы бар. Олардың болжамынша таяу жылдарда қазақстандық бұл тұқымды шетелдіктердің өздері қызыға сатып алулары әбден мүмкін.
Серіктестікке қарасты аумақтың егінжайлары ғылыми жұмыстардың арқасында өзінің байырғы құнарлы қалпына келген. Топырақ таза және жарамды. Серіктестіктің ендігі мақсаты – ізденістерді үзіп алмай, ары қарай жалғап, келесі кезеңнің биіктеріне көтерілу.
Өз тілшілеріміз.
