Облыста шағын және орта бизнес қарыштап дамып келеді. Өткен 9 айдың өзінде шағын және орта кәсіпкерлік субъектілерінің саны 60,1 бірліктен асқан. Кәсібін ашып, шаруасын дөңгелетем дегендерге Үкіметтен қолдау көрсетілуде. Облыстық кәсіпкерлік және индустриялық-инновациялық даму басқармасының мәліметінше биыл шағын және орта кәсіпкерлікті қаржылай қолдауға 7,4 млрд. теңге бөлінген.
Инновациялық жобалар конкурсының негізінде 5 млн. теңге мемлекеттік грант ұтып алып, шыны қалдықтарды қайта өңдеп, кәсібін дамытып отырғандардың бірі – «Класс стекло» ЖШС. Шағын цех 2012 жылдан бері жұмыс істеп келеді. Бүгінде мұнда 6 жұмысшы еңбек етуде. Әйнек үгінділерін балқытып жіп иіріп, өнімді Алматы және Семейдегі кәсіпорындарға өткізеді екен.
– Мемлекеттік грант сомасына кәсіпорынға Қытайдан қажетті жабдықтар сатып алдық. Сынған әйнектен шыны талшықтарын шығарамыз. Сондықтан біздің жобамыз «жасыл экономика» саласына қатысты. Бұл өз кезегінде аймақтың экологиялық тепе-теңдігін сақтауға үлес қосады деп есептеймін. Қазір цехта күніне 300 келі шыны талшықтары шығарылады. Оны құрылыс фирмалары құрылыс арматураларын әзірлеуге қажет материал ретінде сатып алуда, – дейді кәсіпорын басшысы Данил Ким.
Мемлекеттік грант ұтып, жиһаз жасайтын цех ашып, шаруасын шалқытып отырғандардың бірі талдықорғандық жеке кәсіпкер Дәулет Құмархан. Ол мемлекеттен алған қайтарымсыз грантқа сандық бағдарламамен басқарылатын станоктар әкеліп орнатқан.
– Жиһаз жасаумен бұрыннан айналысамын. Бұған дейін жиһаздың беткі қасбетін Алматыдан тапсырыспен алдыратынбыз, кейде оны ұзақ күтіп, жұмыс тұрып қалатын. Енді мемлекеттен көрсетілген қаржылай қолдаудың арқасында жиһаздың беткі қабатын өз цехымызда жасай бастадық. Дәл осындай әмбебап жабдықта әдемі ішкі есіктер жасау да жоспарымда бар, – дейді кәсіпкер.
Облыста кәсіп ашамын деген жандарға үлкен қолдау көрсетілуде. 9 айдың өзінде шағын және орта кәсіпкерлікте 369 жоба мақұлданыпты.
– Пайыздық мөлшерлемені субсидиялауда 249 жобаға, ішінара кепілдендіруде 118 жобаға қолдау көрсетілсе, 5 млн. теңгелік грант беруде 3 жобаны қамту жоспарланған. Осы жобалардың негізінде өңірде 450-ден астам жұмыс орны құрылады. Оған қоса инженерлік-инфрақұрылым жүргізудің 2 жобасына 50,7 млн. теңге қарастырылды, – дейді облыстық кәсіпкерлік және ИИД басқармасының бөлім басшысы Асхат Кәрібаев.
Айдар ҚАЛИЕВ
