Өңірде жарықтандыру мәселесі оңтайлы шешіліп, жүйелі жұмыстар істелуде. Жетісу облысы бойынша көше жарығы желісінің ұзындығы 1 685 шақырымды құрайды. Өткен жылы аймақта 46,7 шақырымға 1850 бағана орнатылған. Сала мамандары биыл да ілгері іс қылуда.
Осы жылы жергілікті бюджет есебінен жалпы сомасы 1,5 млрд. теңгеге 2 550 тірек орнату жоспарға енгізілген екен. Қазіргі уақытқа дейін оның 53,9 шақырымына 2 036 жарықтандыру бағаны орнатылыпты. Осы ретте Ақсу ауданындағы жұмыс барысымен танысып қайттық.
Бұл күні ауданда ұзындығы 40 шақырымды құрайтын көше бойын жарықтандыру істері жүргізіліп жатыр. Бүгінде құрылыс жұмыстарының 60 %-ы аяқталған. Алдағы уақытта Сағабүйен, Матай, Көлтабан ауылдарына 1159 бағана орнатылмақ. Бұл жұмыстарға бюджеттен 761,1 млн. теңге бөлінген.
– Сағабүйен ауылында көше жарықтандыру жұмыстары жүргізілуде, жоба бойынша көше жарықтарының ұзындығы 15 шақырым. Бүгінгі таңда 8 шақырымына 349 бағана орнатылды. Қазір бетон жұмыстары толығымен аяқталды. Ауа райының қолайсыздығына байланысты жұмыс уақытша тоқтатылды. 1-2 күнде жұмыс қайтадан жалғасады. Келесі жылы қолданысқа беріледі, – дейді Ақсу аудандық тұрғын үй-коммуналдық шаруашылық бөлімінің басшысы Мәдияр Нұрахметов.
Сағабүйендіктер жарық шамдардың қолданысқа берілер күнін тағатсыздана күтуде. Қысқы уақыттарда қараңғы ерте түсетіндіктен балаларды мектептен алу, жолдың тайғақтығы сынды мәселелердің шешімі табылатын еді деп қуануда.
– Біздің ауылда 11 үлкен көше бар. Енді, бұл шамдардың бір жақсысы, елді мекенімізді түгелдей жарық қылмақ. Әр үйге, әр көшеге жарық шамдар орнатылып жатыр, – деп ауылдық округ әкімі Нұрқуат Кәкімбаев та қуанышын жасырмады.
Медет ЖҰМАБАЙ
