Қазан айының алғашқы жексенбісі білім саласы қызметкерлерінің кәсби мерекесі. Осыған байланысты Жетісу облысының орталығы Талдықорғанда «Ұстаз ұлы тұлға» атты арнайы іс-шара өтті.
Қаладағы І.Жансүгіров атындағы мәдениет сарайында өткен салтанатты шарада сөз алған Талдықорған қаласының әкімі Ернат Бәзіл жалпы ұстаздар қауымын төл мерекесімен құттықтап, ізгі тілегін жеткізді.
– «Ұстаздар күні – орны бөлек, дәрежесі биік, ең ұлық та ұлағатты мереке. Ұрпақтың ұлы мұраты жолында еңбек етіп жүрген ұстаздардың жөні де, жолы да бөлек. Ұрпаққа білім беріп, тәрбиелеу жолында қызмет атқарып жүрген ұстаздарды ардақтауға міндеттіміз», – деді шаһар басшысы.
Басқосуда бір қатар үздіктерге Талдықорған қаласы әкімінің Құрмет грамотасы және Алғыс хаты, сондай-ақ, Жетісу облыстық мәслихатының және білім басқармасының Құрмет грамотасы мен арнайы Алғыс хаттары табысталып, құрмет көсетілді. Сонымен қатар осы орайда аймақтағы білім шаңырақтары арасында ұйымдастырылған «Үздік бастауыш сынып мұғалімі», «Үздік сынып жетекші», «Үздік балабақша» және «Жетісу ұстазы» сынды байқаулардың жеңімпаздары қаржылай сыйақылармен марапатталды.
Мамандардың мәліметінше, бүгінде Талдықорған қаласына қарасты 27 мектепте 36 мыңға жуық оқушы білім алады. Оларға 2850-ден астам мұғалім білім беруде. Ал, мектепке дейінгі 68 мекемеде 8134 бүлдіршін білім алса, оларға бір мыңнан астам мұғалім сабақ өтеді. Сондай-ақ, биылғы жаңа оқу жылында қала мектептерінің ұстаздар қатары 58 жас маманмен толыққан.
Айдын КӘЛІМХАН
