«Жетісу Медиа» ақпараттық алаңында өткен брифингте «Қазсушар» РМК Жетісу филиалының директоры Саят Құдайбергенов су бөлу жағдайы туралы баяндады.
Оның айтуынша, филиалдың теңгерімінде Жетісу және Алматы облыстарының аумағында 9 су қоймасы, 12 су торабы, 3 су бөгеті және 5102,8 шақырымды магистральді су таратушы канал және коллекторлық-дренаждық желісі бар. Аталған мекеме осы мүмкіндікті пайдалана отырып, Жетісу облысындағы 6 аудандық өндірістік учаске қарамағындағы каналдар арқылы 180438 гектар және Алматы облысының 3 ауданына Шеңгелді ауылына және Ұйғыр, Балқаш аудандарының 32184 гектар суармалы жеріне қызмет көрсетеді. Балқаш – Алакөл бассейндік инспекциясының бұйрығына сәйкес 2016-2025 жылдарға су пайдалануға арналған рұқсат бойынша 1 596 285,9 мың м3 су алады.
Филиал үнемі облыстық ауылшаруашылығы басқармасы мен аудан әкімдіктеріне, ауылшаруашылығы тауарын өндірушілеріне монодақылдардың егістіктерін қысқартуға, су үнемдеу технологияларын қолдануға және мүмкіндігінше ауыспалы егістерді сақтауға, сондай-ақ ауылшаруашылығы дақылдарын егу кезінде оларды орналастыруды филиалдың өндірістік телімдермен келісуге, суармалы суды ұтымды пайдалануға түсіндірме жұмыстарын жүргізіп тұрады.
– Айта кетерлігі, биыл облыс диқандары жылдағыдай су тапшылығын сезінбеді. Алайда егіс көлемінің жыл сайын ұлғаюына байланысты су бөлу аясындағы жұмыстардың да ауқымдана түсетіні анық. Сондықтан уақыт талабына сай қызмет көрсетуге сақадай сай тұрамыз, – дейді Саят Үсенұлы.
Филиал қызметінде облыста жаңа су шаруашылығы нысанын салу, ирригациялық желілерді қалпына келтіру, ағымды және күрделі жөндеуден өткізу туралы жұмыстар жүргізіледі. Бүгінде Қызылағаш су қоймасының құрылысы аяқталды. Ал алдағы уақытта 22,0 млн. м3 Ақсу ауданының Бүйен өзеніндегі су қоймасының құрылысы басталмақ. Ескелді ауданындағы сыйымдылығы 5,0 млн. м3 «Балықты» су қоймасын, Панфилов ауданындағы Қорғас өзенінен сыйымдылығы 10 млн.м3, Өсек өзенінен сыйымдылығы 15 млн.м3, Тышқан өзенінен сыйымдылығы 10 млн. м3 су қоймасын салу көзделуде. Алакөл ауданындағы 2 мың гектар жерді суармалы жерге айналдыру мақсатындағы сыйымдылығы 5,0 млн.м3 Жаманты өзенінен су қоймасын, Көксу ауданындағы сыйымдылығы 15,0 млн.м3 Быжы өзенінен су қоймасын салудың техникалық-экономикалық негіздемесі жасалуда.
Егер аталған су қоймалары салынатын болса облыста су тапшылығы азаяды. Есесіне суармалы жерлер ұлғайып, су бөлу жұмысы жеңілдей түспек.
Қажет АНДАС
